केहीदिनअघि भएको लोकसभा चुनावमा पार्टीले अपेक्षित नतिजा ल्याउन नसकेपछि भारतीय कंग्रेसका अध्यक्ष राहुल गान्धी र तृणमूल कंग्रेसकी अध्यक्ष तथा पश्चिम बंगालकी मुख्यमन्त्री ममता बेनर्जीले राजीनामा दिने बताए। तर ती दुबै पार्टीले उनीहरूको राजीनामा अस्वीकार गरेका छन्।
१७ औं लोकसभा चुनावमा पनि पार्टीले पाँच वर्षअघिकोजस्तै नतिजा ल्याएपछि शनिबार बसेको कंग्रेस (आई) को केन्द्रीय समिति बैठकमा राहुलले हारको सत प्रतिशत जिम्मा लिँदै आफू अब अध्यक्षमा बस्न नचाहेको बताएका थिए।
आफू पार्टीको सिपाहीका रूप लड्ने तर अध्यक्षबाट राजीनामा दिने भन्दै उनले राखेको प्रस्तावले केन्द्रीय समितिले एक मतले अस्वीकार गरेको थियो।
शुक्रबार सार्वजनिक भएको लोकसभाको मतपरिणाममा कंग्रेसले ५४२ मध्ये ५२ सिटमात्र जितेको थियो भने सत्तारूढ भारतीय जनता पार्टीले ३ सय ३ सिटमा जित हात पारेको थियो।
यता पश्चिम बंगालमा आफ्नो पार्टी तृणमूल कंग्रेसलाई धक्का लागेपछि मूख्यमन्त्री ममता बेनर्जीले पनि पदबाट राजीनामा दिन चाहेको बताएकी छन्।
चुनावी परिणाम आएपछि शनिबार पत्रकार सम्मेलनमा बोल्दै बेनर्जीले आफूले मुख्यमन्त्रीबाट राजीनामा दिन चाहेको बताइन्।
‘मैले पार्टीलाई भनिसकेकी छु, छ महिनादेखि मैले काम गर्न सकेकी छैन। म एक कमजोर मुख्यमन्त्री थिएँ। र म यो स्वीकार्न सक्दिनँ। म मुख्यमन्त्री भइरहन चाहन्नँ। मेरा लागि कुर्सी केही पनि होइन, पार्टीको प्रतीक ज्यादै महत्वपूर्ण हो,’ बेनर्जीले भनिन्।
लोक सभा चुनावमा बेनर्जीको पार्टीले ४२ मध्ये २२ सिट जितेको छ भने भाजपाले १८ सिट हात पारेको छ। पाँच वर्षअघि पश्चिम बंगालमा तृणमूलले ३४ सिट जितेको थियो भने भाजपाले दुई सिटमात्र हात पारेको थियो।
बेनर्जीले आफ्नो राजीनामा प्रस्ताव पार्टीले अस्वीकार गरिदिएको पनि जानकारी दिइन्।
