सत्तारुढ दल नेपाल कम्युनिष्ट पार्टी (नेकपा)का स्थायी समिति सदस्य एवम् पूर्व उपप्रधानमन्त्री टोपबहादुर रायमाझीले वायु सेवा निगमको वर्तमान नेतृत्व असक्षम भएको भन्दै तत्काल नयाँ नेतृत्व ल्याउनुपर्ने स्पष्ट पारेका छन्।
मंगलबार रिपोर्टर्स क्लबमा आयोजित साक्षात्कार कार्यक्रममा बोल्दै रायमाझीले भने, ‘वाईडबडीलाई भारतको नयाँ दिल्ली, मुम्बई र कलकत्ता मात्रै उडाएर हुँदैन, नजिकको दुरीमा कुनै फाइदा हुँदैन।’
निगमका वर्तमान अध्यक्षले वाईडबडीलाई लामो दुरीमा उडान भर्ने वातावरण बनाउन नसकेको भन्दै रायमाझीले आलोचना गरे। निगमसहित सरकारी संस्थानहरु कमजोर हुनुका सम्वन्धमा अध्ययन गरेर समस्या समाधान गर्नुपर्नेम उनको जोड छ। ‘प्राईभेट कम्पनीले चलाउन सक्ने सरकारीले किन नसक्ने ?’ उनले प्रश्न गरे।
निगमको नेतृत्व नै असफल भएको भन्दै उनले नयाँ सक्षम नेतृत्वलाई ल्याउनुपर्नेमा जोड दिए। उनले भने ‘अहिलेका अध्यक्षले काम गर्न नसके तत्काल फेर्नुपर्छ।’
रायमाझीले यो वर्षको बजेट गत वर्षको भन्दा राम्रो आएको टिप्पणी गरे। उनले सांसदहरुलाई दिइएको ६ करोड बजेट राम्रो भएको उल्लेख गर्दै भने भने, ‘सांसदहरुलाई दश करोड दिएको भए राम्रो हुन्थ्यो।’
उनले सांसदलाई दिने पैसा दुरुपयोग हुने शंका भएमा त्यसलाई कानून तथा नियमावली बनाएर नियन्त्रण गर्नुपर्नेमा जोड दिए।
सरकारले देश डुबाउन लाग्यो : लेखक
प्रमुख प्रतिपक्षी दल नेपाली कांग्रेसका नेता एवम् पूर्व मन्त्री रमेश लेखकले वाईडबडी मात्रै नभएर यो सरकारले देश नै डुबाउन लागेको आरोप लगाए। उनले भने, ‘देशको वाईडबडी नै डुब्दैछ, समयमै यसबारेमा चेतना जाग्न जरुरी छ।’
सरकारले ल्याएको बजेट अदुरदर्शी र भ्रमपूर्ण रहेको पनि उनले टिप्पणी गरे। वर्तमान सरकारले विकासका सबै काम विदेशीलाई जिम्मा लगाएको उनको आरोप छ । उनले भने, ‘सरकारले विकासको कुरा उधारो गरेको छ ।
यही तरिकाले समृद्धि आउँदैन।’ वर्तमान सरकारले साढे दश महिनामा ४४ प्रतिशत मात्रै पुँजीगत खर्च गर्नुले कसरी समृद्धि आउँछ? भन्दै लेखकले प्रश्न गरे।