राष्ट्रिय प्रजातन्त्र पार्टीका अध्यक्ष कमल थापाले राजसंस्था र हिन्दु राज्यलाई विस्थापित गरी धर्मनिरपेक्षता र गणतन्त्र ल्याइएकाले देशले गति लिन नसकेको बताएका छन्।
थापाले राज संस्थाको विकल्प गणतन्त्र र हिन्दु राज्यको विकल्प धर्मनिरपेक्षता हुन नसक्ने दावी गरे। बुटवलमा आयोजित राष्ट्रिय प्रजातन्त्र पार्टी प्रदेश कार्यालय उद्घाटन तथा अध्यक्ष एवं सचिवहरुको भेलामा बोल्दै उनले राजासहितको प्रजातन्त्र र हिन्दु राज्य कायम गर्नुपर्ने बताए।
नेपालमा कांगे्रस कम्युनिष्टहरुको विकल्प राप्रपा भएको भन्दै उनले आगामी निर्वाचनमा राप्रपाले अग्रस्थान कायम गर्ने दावी गरे। हिन्दु राष्ट्र पुनःस्थापनाका लागि जनताले राप्रपालाई अग्रस्थानमा पुर्याउने उनको दावी छ।
दुई तिहाई बहुमत प्राप्त गरेको सरकारले जनताको भावनालाई कदर गर्न नसकेको आरोप लगाउँदै उनले सरकार असफलतातर्फ उन्मुख भएको बताए। सरकारले जनताका न्यूनतम समस्या पनि समाधान गर्नु त कता हो कता बेरोजगार र भ्रष्टाचार न्यूनीकरणमा पनि सरकार चुकेको बताए।
सरकारले कार्यकर्ता पालनपोषण गर्ने खालको वितरणमुखी बजेट ल्याएको र यसले देशमा रोजगारीको सिर्जना गर्नै नसक्ने थापाको भनाई छ। राष्ट्रिय प्रजातन्त्र पार्टीका बरिष्ठ उपाध्यक्ष दिपक बोहोराले टुटफुटको राजनीतिले राप्रपा अगाडि बढ्न नसक्ने बताए। उनले विचार मिल्ने पार्टीहरुसँग एकता गर्नुपर्ने र आज पार्टी एकता भए भोलिका दिनमा राप्रपाले सरकार बनाउन सक्ने दावी गरे।
