नेताहरुलाई दोहोरो जिम्मेवारी दिने या नदिने भन्ने बिषयको मतमतान्तर नसुल्झिएपछि नेकपाको कार्यबिभाजन पर धकेलिएको छ।
आज बसेको सचिवालय बैठकमा ७७ वटै जिल्लाका इन्चार्ज, सह-इन्चार्जको टुंगो लगाउने र केन्द्रीय कमिटीको कार्यबिभाजन गर्ने तयारी थियो। तर पहिले नै जनप्रतिनिधि भइसकेका, मन्त्री तथा सांसद र पार्टीको जिम्मेवारीमा रहिसकेका नेताहरुलाई फेरि दोहोर्याएर जिम्मेवारी दिने या नदिने भन्ने बिषयमा प्रधानमन्त्री तथा पार्टी अध्यक्ष केपी शर्मा ओली र नेता माधवकुमार नेपालबीच मत बाँझिएको थियो।
प्रधानमन्त्री ओली पहिले नै स्थानीय तहका जनप्रतिनिधि, प्रदेश सांसद या मन्त्री भइसकेका भएता पनि केही नेताहरुको कामको गाम्भीर्यता हेरेर दोहोरो जिम्मेवारी दिँदा फरक नपर्ने पक्षमा थिए। बैठकमा ओलीलाई महासचिव विष्णु पौडेल र रक्षामन्त्री एवम् सचिवालय सदस्य इश्वर पोखरेलको साथ थियो।
गृहमन्त्री रामबहादुर थापा बादल पनि यही पक्षमा उभिए । तर सचिवालय सदस्यहरु माधवकुमार नेपाल, झलनाथ खनाल र वामदेव गौतमले एउटै नेतालाई धेरै जिम्मेवारी दिँदा काम प्रभावकारी पनि नहुने र पार्टीमा लामो समय मेहनत गरेका अरु सदस्यहरुको अवमुल्यन हुने तर्क राखेपछि बैठक निचोडमा नपुगेको हो।
माधव नेपालको यही अडानलाई पगाल्ने प्रयास स्वरुप अध्यक्ष द्वय ओली र पुष्पकमल दाहालले वबहान उनीसँग छुट्टै भेट पनि गरेका थिए। स्थानीय तहको जनप्रतिनिधि, प्रदेश सांसद, प्रतिनिधि सभा सदस्य तथा मन्त्रीहरुमा ओली पक्षधरकै बहुमत छ। त्यसैले पनि अहिले आफ्नो अडानमा यथावत् रहेमा पार्टी कमिटीको तल्लो तहसम्म पहुँच विस्तार गर्न सकिने आकांक्षा ओली इतरका नेताहरुको छ।
तर आफ्नो पकडलाई कुनै पनि हालतमा कमजोर हुन नदिने ओलीको रणनीति छ। पूर्व एमालेका नेताहरुकै यो दाउपेचका बीचमा पूर्व एमाओवादीका तर्फबाट सचिवालय सदस्य बनेकाहरुमध्ये रामबहादुर थापा बाहेक अरु आजको छलफलमा निष्क्रिय रहेको स्रोतले बतायो।
पार्टीका नेताहरुलाई दोहोरो जिम्मेवारी दिन हुने र नहुने तर्कले सचिवालयमा पनि महत्वपूर्ण अर्थ राख्ने भएकाले पनि नेताहरुले अडान नछोडेका हुन्।
दोहोरो जिम्मेवारी सुम्पिएपनि फरक नपर्ने मापदण्ड कायम रह्यो भने अहिले प्रधानमन्त्री ओलीका सबैभन्दा निकट मानिएका विष्णु पौडेल, इश्वर पोखरेल र रामबहादुर थापालाई फाइदा हुनेछ।
उनीहरुले आफैले चाहे अनुसार पार्टीको महत्वपूर्ण विभागको जिम्मेवारी पाउने छन्। ‘यसो हुनु भनेको पार्टीमा कमजोर देखिएका माधवकुमार नेपाल, झलनाथ खनाल र वामदेव गौतम अझै कमजोर हुनु हो’ स्रोत भन्छ ‘त्यसैले पनि दोहोरो जिम्मेवारीबारेको यो बहस अझै पेचिलो बन्ने सम्भावना छ ।’