राष्ट्रिय प्रजातन्त्र पार्टी (संयुक्त) का अध्यक्ष पशुपति शमसेर राणाले नेपाललाई हिन्दु राष्ट्र बनाउनको लागि छिट्टै सशक्त सडक संघर्षमा उत्रिने घोषणा गरेका छन्।
बुधबार राजधानीमा आयोजित पत्रकार सम्मेलनमा बोल्दै अध्यक्ष राणाले आफूहरूले हिन्दु राष्ट्र बनाउने बाचा गरिसकेकोले यसको लागि सम्पूर्ण शक्तिहरू सशक्त सडक संघर्षमा उत्रिने बताएका हुन्।
उनले भने,‘नेपाललाई विदेशीको इशारामा दुई/चार जना नेताले धर्मनिरपेक्षता बनाए। हाम्रो पार्टी यसविरूद्धमा छ। अब सम्पूर्ण शक्ति एक भएर धर्मनिरपेक्षतालाई उल्टाउँछौं।’
उनले नेपालमा ८१ प्रतिशत हिन्दु र ९४ प्रतिशत ॐकार परिवार रहेकोले अब सबै एकीकृत भई हिन्दु राष्ट्र बनाउन लाग्नुपर्नेमा जोड दिए। उनले नेपाललाई हिन्दु राष्ट्र बनाउनको लागि विदेशी सहयोग नचाहिने पनि स्पष्ट पारे।
राणाले थपे,‘नेपाललाई हिन्दुराष्ट्र बनाउनको लागि हामीलाई अन्तको सहयोग चाहिँदैन। हामीसँग भएको संख्या नै काफी छ।’
अध्यक्ष राणाले प्रमुख प्रतिपक्षी दल नेपाली कांग्रेस यतिबेला ढुलमुल भएर बसिरहेको पनि आरोप लगाए।
उनले भने,‘कांग्रेसले प्रमुख विपक्षीको भूमिका खेल्नै सकेको छैन। अब कांग्रेसले प्रष्टरूपमा विरोधी शक्तिको नेतृत्व लिनुपर्छ।’
राणाले वर्तमान ओली सरकार यही रूपमा अघि बढे उपयुक्त छैन भन्ने कुरामा कांग्रेस प्रष्ट हुनुपर्नेमा जोड दिए।
आफ्नो पार्टी र कमल थापाले नेतृत्व गरेको राप्रपाबीच एकताको सम्भावना रहेको पनि उनले सुनाए।
उनले भने,‘राय मिल्ने शक्तिसँग एकता हुन्छ।’ अध्यक्ष राणाले वर्तमान प्रधानमन्त्री ओलीले राजनीतिक रूपमा बहुदलीय व्यवस्था यता अहिलेसम्मकै ठूलो उपलब्धि हासिल गरेको पनि सुनाए।
उनले भने,‘उहाँले एमाले र माओवादी केन्द्रलाई एकता गरेर नेकपा बनाउनुभयो, नेकपाले चुनावमा भारी बहुमत हाँसिल गर्यो। उपेन्द्र यादवसहित उहाँले दुई तिहाईको सरकार बनाउनुभयो। यो राजनीतिक रुपमा ठूलो सफलता हो।’
शक्तिशाली सरकार गठन भएको एक वर्षभन्दा बढि समय व्यतित भइसक्दापनि अहिलेसम्म जनताले ठोस उपलब्धि प्राप्त गर्न नसकेको उनको आरोप छ। उनले भने,‘आखिरीमा यो सरकारको काम हेर्दा हात्ति आयो हात्ति फुस्साजस्तै छ ।’
प्रधानमन्त्री ओलीले प्राप्त म्याण्डेटअनुसार काम गर्न नसकेको उनको अर्को गम्भिर आरोप छ। उनले भने,‘जनताले उहाँलाई मनपरी गर्नको लागि बहुमत दिएको होईन । बरु, राष्ट्र बनाउनको लागि दिएको हो। त्यो कुरा उहाँले बुझ्नुपर्छ। अहिले लामो अवधि भैसक्यो उहाँले शासन गर्नुभएको, तर मुलुक फेरवदल गर्न केही पनि गर्न सक्नुभएन।’
मुलुकमा व्यापक भ्रष्टाचार रहेको सुनाउँदै सरकारले यसप्रति पनि चासो नदेखाएको उनको आरोप छ। राणाले थपे,‘बुढीगण्डकी, मेलम्चीजस्ता आयोजनामा पनि भ्रष्टाचार भएको छ । हरेक कुरामा भ्रष्टाचारको दुर्गन्ध छ । तर, प्रधानमन्त्रीजीले प्राप्त गरेको म्याण्डेटअनुसार आफ्नो इमानदारिता देखाउन सक्नुभएन ।’
सरकारको विरोधी शक्तिहरू एकीकृत भएर सरकारले गरेका हरेक बेइमानी र गल्तीहरूको विरूद्धमा अब सडकमा उत्रिनुपर्ने पनि राणाले आवश्यकता औंल्याए।
उनले भने,‘यो सरकारबाट राष्ट्रको सुरक्षा र मुलुकको उत्थान हुन सकेको छैन। हरेकतर्फ विकृति देखोपरेको छ। हामी सरकारको मनपरीविरूद्धमा उत्रिनुपर्छ।’
बूढीगण्डकीजस्तो ठूलो परियोजनामा बिना प्रतिस्पर्धा ठेक्का दिनु गलत भएको उनको टिप्पणी छ।
उनले भने,‘प्रमुख प्रतिपक्षी दलको हैसियतले नेपाली कांग्रेसले अब सरकारले गरेका हरेक अकल्याण कामहरू ओकल्नुपर्छ ।’
हिन्दूराष्ट्र स्थापनाको लागि गरिने सडक संघर्ष र सरकारको विरुद्धमा गरिने संघर्षका कार्यक्रम दुवै अलग–अलग विषय भएको पनि उनको भनाइ छ। हिन्दु राष्ट्र पुनर्स्थापनाको लागि सकेसम्म छिट्टै सडकमा आउने पनि उनले जनाए।