नेपालका लागि इरानका राजदूत डा. अलि चेगेनीले नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’सँग भेटवार्ता गरेका छन्।
अध्यक्ष निवास खुमलटारमा आज अपरान्ह भएको भेटमा नेपालको आर्थिक समृद्धिमा कृषि क्षेत्रको व्यवसायीकरण र कृषिमा आधारित उद्योगहरूको विकासका बारेमा छलफल भएको थियो।
नेपालीहरूको संघर्ष र बलिदानले नेपालमा राजनीतिक स्थायित्व कायम भएको बताउँदै अध्यक्ष प्रचण्डले अब आफूहरूको सम्पूर्ण ध्यान मुलुकको आर्थिक समृद्धिमा रहेको बताए।
उनले भने, ‘हामी नेपालमा वैदेशिक लगानीका लागि अनुकूल वातावरण बनाउन चाहन्छौं।’
अध्यक्षले इरान र नेपाल पुराना मित्र राष्ट्र भएको बताए।
उनले नेपाल प्राकृतिक रूपमा धेरै सुन्दर देश भएकाले पर्यटन क्षेत्रको विकासका लागि प्रसस्त सम्भावना रहेको औंल्याए।
अध्यक्ष प्रचण्डले राजनीतिक स्थिरता पश्चात आर्थिक समृद्धिको चरणमा रहेको नेपालका लागि कृषि, पर्यटन, जलविद्युत लगायतका क्षेत्रमा लगानीको प्रशस्त सम्भावना रहेको बताए।
इरानी राजदूत डा. अलिले नेपालमा काम गर्नका लागि आफूहरूसँग राम्रो क्षमता भएको बताए।
राजदूतले चिकित्सा शिक्षा, कृषि, खानीलगायतका क्षेत्रमा आफूहरू काम गर्न इच्छुक रहेको बताए।