राष्ट्रिय प्रजातन्त्र पार्टीका अध्यक्ष कमल थापाले राजनीतिक मूलधारमा पूर्वराजा र विप्लव समूह अटाउने गरी गोलमेच सम्मेलनको माग गरेका छन्।
पोखरामा मिडिया नेपाल कास्कीले आयोजना गरेका कार्यक्रममा थापाले देशमा स्थायित्व, मुलुकको समृद्धि हासिल गर्न राजसंस्थादेखि विप्लव समूह अटाउने गरी नेपाली परिवेश अनुसारको सर्वपक्षीय गोलमेच सम्मेलन गर्न पुन: माग गरेका छन्।
मुस्ताङको मुक्तिनाथदेखि सुरू गरिने राप्रपाको दोस्रो राष्ट्रिय स्वाभिमान यात्राको पूर्व सन्ध्यामा पोखरामा भएको कार्यक्रम उनले केहीदिन अगाडि बुटवलमा राखेको गोलमेच सम्मेलनमा गरेको माग दोहोर्याएका हुन्।
उनले नयाँ संविधान निर्माणसँगै शान्ति र राजनीतिक स्थिरता आउनुपर्ने भए पनि त्यस्तो हुन नसकेको भन्दै गोलमेच सम्मेलनको माग गरे।
देशको पछिल्लो १२ वर्षे राजनीतिक अवस्था हेर्दा पनि स्थायी रूपमा राजनीतिक अवस्था अगाडि बढ्न सकेन निषेधको राजनीतिक अगाडि बढिरहेको उनको भनाइ छ।
‘संविधान निर्माणपछिको दुई वर्षले पनि त्यस्तै देखायो, यो सबै कारण संविधान विरोधाभाषले गर्दा भएको हो,’उनले भने।
उनले सत्तापक्ष र विपक्षी संस्थागत भ्रष्टाचारमा लागेर व्रह्मलुट मच्चाइमा लागेको आरोप लगाए।
राजनीतिक सहमतिमा अर्बौ रुपैयाँको भ्रष्टाचार गरिरहेको उनको भनाइ छ।
वाइड बडी खरिद, एनसेलको कर छली, सुन तस्करी, सार्वजनिक जग्गा व्यक्तिको नाममा बनाउने कार्यमा नेकपा र नेपाली कांग्रेसका शीर्ष नेताको मिलेमतो रहेको उनको आरोप थियो ।
उनले देशमा यतिबेला ६ वटा चुनौती रहेको बताए।
‘गरिबी, भ्रष्टाचार, धर्म परिवर्तन,राष्ट्रिय विखण्डनको खतरा, सर्वसत्तावादको खतरा, शान्ति स्थापना अहिले देशका मुख्य चुनौती हुन्’, उनले भने।
सरकारले प्रस्तुत गरेको आर्थिक वर्ष २०७६/०७७ को बजेटका राम्राभन्दा नराम्रा पक्ष बढी रहेको उनले टिप्पणी गरे।