नेपाली कांग्रेसकी सचेतक पुष्पा भुसाल गौतमले बजेट वितरणमुखी र बरालिएर आएको टिप्पणी गरेकी छन्।
प्रतिनिधिसभाको बिहिबारको बैठकमा आगामी आर्थिक वर्ष २०७६/७७ को बजेटमाथिको छलफलमा सहभागी हुँदै उनले शक्तिशाली सरकारका अगाडि मुलुक बनाउने ठूलो अवसर भए पनि बजेट बरालिएर आएको उनले बताएकी हुन्।
पुँजीगत खर्च देखेर आफूहरूलाई निराश बनाएको भन्दै उनले कार्यकर्तालाई, नेतालाई खुसी पार्नका लागि बजेट दुरुपयोग हुन सक्ने आशंका गरिन्।
विगतमा श्री ३ को र श्री ५ को बाहुलीमा रकम चढाए जस्तै गरी प्रधानमन्त्रीको कार्यालयलाई रकम चढाउने ढंगले अत्यन्तै वितरणमुखी बजेट आएको उनले दाबी गरिन्।
तत्कालीन प्रधानामन्त्री बीपी कोइरालाले मुलुकको आर्थिक नीति बनाउने क्रममा ‘म मेरो नेपाली जनतालाई १५ बर्षमा म जत्तिकै बनाउँछु’ भनेर उद्घोष गरेको स्मरण गर्दै उनले अर्थमन्त्रीलाई प्रश्न गरे, ‘आज म अर्थमन्त्रीलाई म प्रश्न गर्न चाहन्छु। अर्थमन्त्री ज्यू, आफ्नो क्षमता, आफ्नो योग्यता, आफू जस्तै नेपाली जनतालाई कहिले बनाउने ? यस्तो बरालिएको बजेटले नेपाली जनतालाई अर्थमन्त्री जत्तिको बनाउन सक्दैन।’
उनले संघीयता विरोधी बजेट आएको भन्दै संशोधनको माग गरिन्। उनले बजेट संघीयता विरोधी भएको, बजेटले प्रदेशको उन्नति र समृद्धिभन्दा सिंहदरबारको समृद्धि र केन्द्रको समृद्धितर्फ आँखा लगाएको टिप्पणी गरिन्।
नेपाली कांग्रेसको सरकारको समयमा धेरै युवाहरू विदेश गए भन्ने भनाइमा सत्यता नभएको भन्दै उनले तथ्यांक हेर्न आग्रह गरिन्। उनले नेपाली कांग्रेसको सरकारको समयमा मुलुकभित्र धेरै रोजगारी सृजना भएको दाबी समेत गरिन्।
