प्रधानमन्त्री केपी शर्मा ओलीका परराष्ट्र मामिला सल्लाहकार डा. राजन भट्टराईले प्रधानमन्त्रीको भोलिबाट सुरु हुने साताव्यापी युरोप भ्रमण द्विपक्षीय महत्वका विषयमा केन्द्रित हुने बताएका छन्।
शुक्रबार रिपोर्टर्स क्लब नेपालले प्रधानमन्त्रीको युरोप भ्रमणको पूर्व सन्ध्यामा आयोजना गरेको विशेष साक्षात्कारमा बोल्दै उनले बेलायत, स्वीट्जरल्याण्ड र फ्रान्ससँगको सम्बन्धका आधार र सहकार्यलाई प्राथमिकतामा राखेर भ्रमण हुने दावी गरे।
उनले भने, ‘हाम्रो विकासलाई पुँजी, प्रविधि र ज्ञानको आवश्यकता छ, सोहीअनुसार सहयोग लिनको लागि पनि यो भ्रमण फलदायी हुनेछ।’ भट्टराईले ब्रिटिस गोर्खासम्बन्धी समस्याको बारेमा नेपालले आफ्नो राष्ट्रिय अडान र मान्यतालाई कायम राख्दै अघि बढ्ने पनि बताए।
उनले भने, ‘बेलायसँगको सम्बन्ध १९४७ को सन्धिले गाईड गर्छ। मलाई लाग्छ यसमा तलमाथि हुँदैन।’ प्रधानमन्त्री ओलीले जेनेभास्थित आईएलओको सय वर्ष पुगेको अवसरमा आयोजित शतवार्षिकी कार्यक्रममा चौथो वक्ताको रुपमा सम्बोधन गर्ने कार्यक्रम छ। जहाँ ४० राष्ट्र प्रमुख तथा सरकार प्रमुखको सहभागिता रहनेछ।
प्रधानमन्त्रीको बेलायत भ्रमण अक्सफोर्ड विश्विद्यालयमा सम्बोधन गरेर औपचारिक रुपमा सुरु हुने उनले जानकारी दिए।
पेरिसमा पनि विभिन्न उच्च तहका भेटवार्ता हुने उनको भनाई छ।
ईण्डो–प्यासिफिक स्ट्राटेजीमा नेपाल सहभागी हुन लागेको हो ? भन्ने प्रश्नमा उनले भने, ‘हामीले हाम्रो नीति तय गर्दा राष्ट्रिय आवश्यकतालाई ध्यान दिन्छौँ। कसैले प्रस्ताव ल्याउँदैमा हामी जोडिनुपर्छ भन्ने हुँदैन।’
सरकारले संयुक्त राष्ट्रको वडापत्र, पञ्चशीलको सिद्वान्त, असंलग्न परराष्ट्र नीति, पारस्परिक लाभ र राष्ट्रिय स्वार्थका आधारमा अन्तर्राष्ट्रिय सम्बन्ध कायम गर्ने उनले बताए। भट्टराईले ईण्डो–प्यासिफिक स्ट्राटेजीबारे आन्तरिक रुपमा सम्बद्ध सबै पक्षसँग छलफल हुने बताए।
बेलायतका लागि पूर्व नेपाली राजदुत डा. सुरेशचन्द्र चालिसेले प्रधानमन्त्रीको भ्रमणको अघिल्लो दिनसम्म पनि भ्रमणको एजेण्डा सार्वजनिक नगरिएको बताउँदै गैरआवासीय नेपाली संघलाई रणनीतिक स्रोतको रुपमा उपयोग गर्नुपर्नेमा जोड दिए।
उनले भने, ‘प्रविधि र ज्ञान हस्तान्तरण गर्नु आजको महत्व हो, अब गैरआवासीय नेपालीलाई सरकारी तहमा जोड्नुपर्छ।’
उनले नेपालले आफ्नो ‘स्ट्राटेजी अटोनोमी’ बनाउनुपर्ने जोड दिए। उनले भने, ‘नेपालले आफ्नो राष्ट्रिय स्वार्थलाई ध्यानमा राखेर रणनीति बनाउनुपर्छ।’
परराष्ट्रविद डा. निश्चलनाथ पाण्डेले पछिल्लो समय नेपाल विश्वको प्राथमिकतामा पर्न थालेको सुनाए। नेपालको अन्तर्राष्ट्रिय सम्बन्धको जन्म नै बेलायतसँगको दौत्य सम्बन्धबाट सुरु भएको उनले बताए।
राजपरिवारबाट बेलाबेलामा नेपाल भ्रमण हुने गरे पनि बेलायती प्रधानमन्त्रीको तहबाट अहिलेसम्म कोही पनि भ्रमणमा नआएको उनले सुनाए। अहिलेसम्म एक जना बेलायती प्रधानमन्त्रीले पनि नेपाल भ्रमण गरेका छैनन्।
नेपाल युनेस्कोको पनि सदस्य भएकोले यसलाई प्राथमिकतामा राख्नुपर्ने उनको सुझाव छ। नेपाल चीनको बिआरआईमा हस्ताक्षर गरेको राष्ट्र भएकोले चीन, भारत र अमेरिकाको चासो र स्वार्थमा नेपाल चनाखो हुनुपर्ने उनको सुझाव छ।
