सरकारले ल्याएको मिडिया काउन्सिल विधेयकको विरोधमा पत्रकारहरुले काठमाडौंमा मानव साङ्लो बनाएर प्रदर्शन गरेका छन्।
नेपाल पत्रकार महासंघको अगुवाइमा दोस्रो चरणको आन्दोलन अन्तर्गत शनिबार पत्रकारहरुले आँखामा कालोपट्टी बाँधेर बबरमहलदेखि माइतीघरसम्म प्रदर्शन गरेका हुन्।
मानव साङ्लो बनाउनुपूर्व नेपाल पत्रकार महासंघका अध्यक्ष, पूर्वअध्यक्ष र विभिन्न सञ्चार माध्यमका सम्पादकले सरकारले वैशाख २६ गते राष्ट्रिय सभामा पेश गरेको मिडिया काउन्सिल विधेयक फिर्ता गर्नुपर्ने बताए।
पत्रकारहरुले प्रेस स्वतन्त्रता विरोधी विधेयक सरकारले ल्याएकोले फिर्ता गर्नुपर्ने बताउँदै आएका छन्। तर सञ्चार तथा सूचना प्रविधिमन्त्री गोकुलप्रसाद बाँस्कोटाले विधेयक फिर्ता नलिने अडान राखेका छन्।
सत्तारुढ नेपाल कम्युनिस्ट पार्टीका नेताहरूले पनि विधेयक फिर्ता लिनुपर्ने र परिमार्जन गर्नुपर्ने बताएका छन्। प्रमुख प्रतिपक्षी दल नेपाली कांग्रेसका सभापति शेरबहादुर देउवाले मिडिया काउन्सिल विधेयक फिर्ता नगरे सदन चल्न नदिने चेतावनी दिँदै आएका छन्।
शनिबार मानव साङ्लो प्रदर्शन कार्यक्रममा उपस्थित पत्रकार महासंघका पदाधिकारी, पूर्वपदाधिकारी र सम्पादकहरुले पनि काउन्सिल विधेयक फिर्ता लिन माग गरे। विधेयकमा दश लाखसम्म जरिवाना भराउनसक्ने प्रावधान राखिएकोमा पनि विरोध भइराखेको छ।
कार्यक्रममा कसले के भने?
गोविन्द आचार्य, अध्यक्ष नेपाल पत्रकार महासंघ
मिडिया काउन्सिल विधेयक फिर्ता लिन माग गर्दै नेपाल पत्रकार महासंघले एक महिनादेखि आन्दोलन गरिराखेको छ। आज दोस्रोचरणको अन्तिम कार्यक्रम हो।
एक महिनासम्म पनि सरकार र सम्बन्धित राजनीतिक दलले पत्रकारले राखेका मागबारे कुनै सुनुवाइ गरेनन्। अब महासंघको बैठक बसेर अर्को चरणको आन्दोलन घोषणा गर्छौं।
हाम्रो आन्दोलन कुनै राजनीतिक दल वा सरकारसँग होइन। यो बुझ्न जरुरी छ कि सरकार ढाल्न, मन्त्री ढाल्न र कसैलाई सरकारमा पुर्याउनलाई पनि आन्दोलन गरिएको होइन।
पत्रकारितामा अंकुश लाग्दा विगतमा पत्रि पत्रकार सडकमा आउनुपरेको थियो। सुशील कोइराला, शेरबहादुर देउवा प्रधानमन्त्री हुँदा पनि हामी सडकमा आएका थियौं। महासंघले अनशन बसेको थियो, दिउँसै लाल्टिन बालेर आन्दोलन गर्नुपरेको थियो।
हामी मिडिया काउन्सिल विधेयक फिर्ता नभएसम्म संघर्ष गरिराख्छौं। कथमकदाचित् यो विधेयक पास भयो भने हामीलाई मान्य हुँदैन। हामी आफैं स्वनियम गर्न सक्ने आचारसहिंता बनाउँछौं।
सुरेश आचार्य, पूर्व अध्यक्ष नेपाल पत्रकार महासंघ
हामीलाई लोकतन्त्रमा यसरी सडकमा आउनुपर्छ भन्ने लागेको थिएन। तर पत्रकारहरु फेरि आन्दोलनका लागि सडक आउनुपर्यो। सरकारको यो लोकतान्त्रिक चरित्र होइन।
अहिले प्रेस स्वतन्त्रता जोगाउनुपर्ने परिस्थिति सिर्जना भएको छ। यसका लागि पत्रकारहरु कुनै पनि आन्दोलन गर्न तयार छौं।
धर्मेन्द्र झा, पूर्वअध्यक्ष नेपाल पत्रकार महासंघ
यो आन्दोलन पत्रकारको मात्रै आन्दोलन होइन। अभिव्यक्ति स्वतन्त्रतासँग जोडिएको आन्दोलन हो। नागरिक आन्दोलन हो।
यो मिडिया विधेयक खारेज भएन भने अहिले पत्रकारिता गर्नेलाई मात्र होइन पछिल्लो पुस्तालाई पनि असर पार्छ। यतिमात्र होइन यसको असर नागरिक तहमा पनि पर्छ। यसले लोकतन्त्र धराप पार्छ।
यो विधेयक सुनियोजित छ। झुक्किएर आएकै होइन। लोकतन्त्रका मूल्य मान्यताहरुलाई भताभुंग पार्ने गरी विधेयक आएको छ। लोकतन्त्रलाई निमोठ्ने प्रयास भएको छ त्यसैले विधेयक फिर्ता लिनुपर्छ।
युवराज घिमिरे, सम्पादक देशसञ्चार
सरकारले ल्याएको मिडिया काउन्सिल विधेयक मान्य छैन। यो मात्र होइन मानव अधिकार आयोग सम्बन्धी विधेयकहरु पनि सरकारले निषेध गर्नका लागि ल्याएको छ।
सरकार आफ्नो आधिकारिकता स्थापित गर्न चाहन्छ। प्रेस र नागरिक स्वतन्त्रता कुण्ठित गर्न चाहन्छ र जवाफदेही हुन चाँहदैन। हामीले यस्ता विधेयकहरु फिर्ता लिन दवाव दिनुपर्छ।
सबै तस्बिरहरू : निशा भण्डारी/सेतोपाटी
