नेपाली कांग्रेसका प्रवक्ता विश्वप्रकाश शर्माले पार्टीले अब लगातार तीन वटा निर्वाचन जित्ने संकल्प गरेको बताएका छन्।
आगामी १५ वर्षसम्मको निर्वाचन लगातार जितेर जनताको खुसीयालीका लागि कांग्रेसले काम गर्ने उनले बताए।
‘एउटा होइन तीन वटा निर्वाचन लगातार जितेर जनताको खुसीयालीका लागि कर्म गर्ने संकल्प गरेका छौं,’ गोरखाको दोस्रो नगर सम्मेलन उद्घाटन गर्दै आइतबार प्रवक्ता शर्माले भने।
पहिलो चरणमा देशैभर गरिएको जागरण अभियानले पार्टीमा ऊर्जा दिएको शर्माले बताए।
कांग्रेसबाट स्थानीय तहमा जितेका प्रमुख/उपप्रमुखलाई शर्माले जनतासँग घनिभूत भएर सेवा गर्न आग्रह गरे।
‘कांग्रेस हारेको होला, मरेको छैन नवीन ढंगले जुटौं। कांग्रेसको जीन्दगीमा जित र हार आउँदै गर्छ। कहिले जित्छौं, कहिले हार्छौं तर देशका लागि निरन्तर लागिरहन्छौं,’ शर्माले भने।
मिडिया काउन्सिल विधेयक, गुठी विधेयक, मानव अधिकार आयोगका क्षेत्रमा सरकारी हस्तक्षेप गर्ने गरी विधेयक ल्याएकोमा उनले आपत्ति जनाए।
उनले भने, ‘हिम्मत छ नेपाललाई उत्तर कोरिया बनाउने? प्रेस स्वतन्त्रता खोस्ने?’ उनले कांग्रेस हारेकोले कम्युनिस्टको असली रूप जनताले देख्न पाएको पनि बताए।
‘कांग्रेस हार्यो आफ्नो ठाउँमा होला, तर हारेर राम्रै भयो जनताले कम्युनिस्ट शासन देख्न पाए,’ उनले भने, ‘हिजो महँगी बढ्दा कसले बढायो कांग्रेसले भन्नेहरू आज कम्युनिस्ट शासनमा महँगी हेर्दैछन्।’
केपी शर्मा ओली सरकारले दाइजोको रूपमा बिनाप्रतिस्पर्धा बूढीगण्डकी आयोजना चाइना गेजुवा कम्पनीलाई दिएको पनि उनले बताए।
‘दाइजोको रूपमा गेजुवालाई प्रधानमन्त्रीले बूढीगण्डकी सुम्पिदिए,’ उनले भने, ‘कहाँ छ त्यो गेजुवा कम्पनी प्रधानमन्त्रीले अब खोजिदिनुपर्यो।’
वाइड बडी जहाज खरिद प्रकरणमा सभापति शेरबहादुर देउवालाई बिनाकारण मुछिएको उनले बताए। ‘वाइड बडीमा सभापतिको नाम आयो कांग्रेस बोलेन भन्ने छ। छानबिन गर, कारबाही गर भनेर सभापतिले सदनमा बोल्नु भएको छ। केन्द्रीय समितिले नै भनेको छ,’ उनले भने, ‘न्याय नपाए गोरखा जानु भन्ने जग्गामा बसेर भन्न चाहन्छौं, वाइड बडीबारे डिटेल छानबिन गर। बालुवाटारको जग्गाको छानबिन गर।’