राष्ट्रिय प्रजातन्त्र पार्टीका अध्यक्ष कमल थापाले प्रधानमन्त्री केपी शर्मा ओलीले भनेजस्तो ‘समृद्ध नेपाल, सुखी नेपाली’ नआउने बताएका छन्।
कुनैबेला आफू सरकारमा सहभागी रहेको उल्लेख गर्दै उनले ओली राम्रै ड्राइभर भए पनि गल्ती बाटो हिँडेकोले समृद्धि नआउने दाबी गरे।
‘प्रधानमन्त्री ओली राम्रै ड्राइभर हो। म पनि उहाँसँग सरकारमा रहेर काम गरें,’ गोरखामा सोमबार राष्ट्रिय स्वाभिमान यात्राको दोस्रो चरणको कार्यक्रम समापन गर्दै थापाले भने, ‘बाटो गल्ती भएपछि ड्राइभर जतिसुकै राम्रो भए पनि समृद्ध नेपाल सुखी नेपाली बनाउन सकिँदैन। बाटो सच्याउने काम गरौं।’
उनले राजासहितको प्रजातन्त्र चाहिएको बताए। विप्लव र राजालाई पनि सँगै लिएर हिँड्नुपर्ने थापाको भनाइ छ।
देशमा लोकतन्त्रको आवरणमा लुटतन्त्र चलिराखेको थापाले आरोप लगाए।
नयाँ नेपाल बनाउँछु भन्नेहरूले हिजोको भन्दा पनि खराब ठाउँमा देशलाई पुर्याएको उनको भनाइ छ।
‘नेपाली जनतालाई मालिक बनाउँछु भनेर गरेको आन्दोलनले युवालाई विदेशीको नोकर बनायो,’ उनले भने, ‘हिजो बन्दुक बोक्नेहरू अरबमा पसिना बगाउँदै छन्। बन्दुक बोक्न लगाउनेहरू अरबपति भए।’
देशमा स्थानीय तहदेखि केन्द्रसम्म भ्रष्टाचार बढेको उनले बताए।
‘नांगो बम्हलुट भइराखेको छ। बाइड बडीदेखि सुन प्रकरणमा छानबिन गरेजस्तो गरिन्छ। ठूला मान्छेको नाम आउँछ त्यसपछि सामसुम,’ उनले भने।
सरकार, सत्तारूढ दलमात्रै होइन भ्रष्टाचारमा प्रमुख प्रतिपक्षसहितको राष्ट्रिय सहमति रहेको उनले आरोप लगाए।
‘राजालाई पाखा लगाइहाले भ्रष्टाचारीलाई कसले कारबाही गर्ने?,’ उनले भने, ‘कारबाही गर्ने निकायमा सबै आफ्ना मान्छे राखेका छन्।’
जनताले हिन्दु राष्ट्र चाहिन्छ भने पनि हिन्दु राष्ट्र मास्न खोस्नेलाई नै भोट हालेर जिताइदिएको थापाको भनाइ छ।
‘धर्म र संस्कृतिमाथि योजनाबद्ध आक्रमण भइराखेको छ,’ उनले प्रश्न गरे, ‘धर्म, संस्कृति मासेर कुन देशले विकास गरेको छ?’
देशको मुख्य चुनौती गरिबी, बेरोजगारी र भ्रष्टाचार भएको उनले बताए।
धर्म, संस्कृति बचाउन र भ्रष्टाचार रोक्न युवा जाग्नुपर्ने थापाको भनाइ छ।
धर्म परिवर्तनका लागि विदेशीले पैसाको खोलो बगाएको आरोप उनले लगाए।