नेपाली कांग्रेसले देशभरि आफ्नो पार्टीबाट उठेर स्थानीय तहमा विजयी भएका मेयर/उपमेयरलाई सेवा, संगठन र समृद्धिसँग सम्बन्धित विषयमा प्रशिक्षण दिने भएको छ।
नेपाली कांग्रेसका प्रवक्ता विश्वप्रकाश शर्माले साउन महिनाको पहिलो साता काठमाडौंमा प्रशिक्षण हुने बताए।
बिहिबार पार्टी कार्यालय सानेपामा पत्रकार सम्मेलनमा बोल्दै नीति अनुसन्धान तथा प्रशिक्षण प्रतिष्ठानले सात वटा प्रदेशलाई १४ वटा समूह बनाएर प्रशिक्षण दिने पनि उनले जानकारी दिए।
साउनकै पहिलो सातामा प्रदेश १ को धनकुटा र कर्णाली प्रदेशको सुर्खेतमा पनि प्रशिक्षण दिने उनले बताए।
३३ मुलुकमा रहेका विभिन्न जनसम्पर्क समितिका महाधिवेशन प्रतिनिधिलाई पनि जुन २१ देखि २३ सम्म डेनमार्कमा प्रशिक्षण दिने कांग्रेसले निर्णय गरेको छ।
प्रशिक्षणमात्र हैन विश्वभर छरिएर रहेका नेपालीहरूको भूमिका नेपालको समृद्धिमा के हुन्छ भन्नेबारे विशेष अन्तर्क्रिया पनि हुने प्रवक्ता शर्माले जनाए।
विश्वमा बढ्दै गएको तापक्रम र यसले नेपालमा पार्न सक्ने प्रभाव, विश्वमा बदलिएको राजनीति, दक्षिण एसिया र नेपाल भन्ने विषय र समाजवादको यूरोप अनुभवको आलोकमा नेपाल भन्ने विषयमा पनि उक्त अन्तरकृयाका विषय हुने छन्।