इजराइलका प्रधानमन्त्री बेन्जामिन नेतन्याहूकी पत्नी सारा नेतन्याहूलाई राज्यकोषको दुरूपयोग गरेको भन्दै जरिमाना तिराइएको छ।
साराले प्रधानमन्त्री निवासमा भान्सा नभएको झुठो कुरा गर्दै बाहिरका रेष्टुरेन्टबाट महंगो खाना ल्याएर खाने गरेको भन्दै अदालतमा मुद्दा परेको थियो।
सरकारले भान्सा र भान्से दुबैको व्यवस्था गरे पनि साराले महंगो खानामा झन्डै १ लाख डलरबराबर पैसा राज्यकोषबाट दुरूपयोग गरेको अभियोग लागेको थियो।
सोही मुद्दामा आइतबार जेरूसेलमको एक अदालतले सारालाई १५ हजार डलर जरिमाना तिर्नु पर्ने फैसला गरेको छ। जरिमाना कम भए पनि उनी अब आपराधिक रेकर्डमा हुनेछिन्।
गत वर्ष साराका वकिलले उनलाई बाहिरबाट त्यसरी खाना ल्याउनु हुँदैन भन्नेबारे जानकारी नगराइएको तर्क गरेका थिए।
पत्नीको बचाउ गर्दै बेन्जामिनले उनका काममा कुनै गल्ती हुन नसक्ने बताएका छन्।
बेन्जामिन आफैं पनि घुस र धोकाधडीका तीन मुद्दा खेपिरहेका छन्। यी मुद्दाको अन्तिम सुनुवाइ आगामी अक्टोबरमा हुने तय भएको छ।
