प्रधानमन्त्री केपी शर्मा ओलीले सरकारले संसदमा दर्ता गरेको गुठीसम्बन्धी विधेयकबारे छलफल तीव्र पारेका छन्।
आइतबार आठ दिने युरोप भ्रमणबाट फर्किएका प्रधानमन्त्री ओलीले विमानस्थलमा सञ्चारकर्मीसँग कुरा गर्दै विधेयकमा गल्ती भए सरकारले सच्याउने प्रतिवद्धता व्यक्त गरेका थिए।
सोहीअनुसार सोमबार बिहानदेखि नै उनले यसबारे विभिन्न पक्षसँग छलफल गरेका छन्।
स्रोतका अनुसार भूमि व्यवस्था, सहकारी तथा गरिबी निवारण मन्त्री पद्मा अर्यालले पनि विधेयकबारे प्रधानमन्त्रीलाई ब्रिफिङ गरेकी छन्।
सोमबार अपरान्ह प्रधानमन्त्री निवास बालुवाटारमा मन्त्री अर्यालयले विधेयकका व्यवस्था र भइरहेको विवादबारे प्रधानमन्त्रीलाई जानकारी गराएकी हुन्।
यसअघि प्रधानमन्त्री विदेशमा हुँदा मन्त्री अर्यालले विधेयकको विरोध गरिरहेका काठमाडौंका गुठियार र जनप्रतिनिधिसँग मन्त्रालयमै छलफल गरेकी थिइन्।
मन्त्रीको ब्रिफिङपछि प्रधानमन्त्रीले काठमाडौं उपत्यकाका जनप्रतिनिधि र गुठियारसँग छलफल गर्न लागेको बालुवाटार स्रोतले जनाएको छ।
दिउँसो तीन बजेतिर बैठक बस्ने गरी प्रधानमन्त्रीले काठमाडौं, भक्तपुर र ललितपुरका सांसद, मेयर, केही वडाध्यक्ष र गुठियारलाई बोलाएका छन्।
प्रधानमन्त्री ओली आजै साँझसम्म गुठी विधेयकबारे निर्णयमा पुग्ने बताइएको छ।
सत्तारूढ नेपाल कम्युनिष्ट पार्टीका सांसद योगेश भट्टराईले गुठी विधेयकका विषयमा प्रधानमन्त्रीले थप सक्रियता बढाएको बताएका छन्।
उनले ट्वीटरमा लेखेका छन्- आशा छ साँझसम्ममा राम्रो परिणाम आउने छ। धमिलो पानीमा माछा मर्न खोज्नेको भागमा भ्यागुत्तोमात्र हात लाग्नेछ।
राष्ट्रिय सभामा दर्ता भएको गुठीसम्बन्धी विधेयकले आफ्नो परम्परा मास्न खोजेको भन्दै उपत्यकाका तीनै जिल्लाका नेवार समुदाय आन्दोलनमा होमिएका छन्।
