राजश्व अनुसन्धान विभागले विभिन्न तीन व्यापारिक फर्म तथा व्यक्तिहरूविरूद्ध काठमाडौं जिल्ला अदालतमा मुद्दा चलाएको छ।
आयकर, मूल्यअभिबृद्धि तथा भन्सार छली सरकारलाई करोडौं राजश्व छलेको अभियोगमा न्यू किरण स्पेयर्स, किरण ट्रेड एन्ड सप्लायर्स प्रालि तथा सञ्चालक राजेश प्रसाद कलवार, मधुकुमारी गुप्ता र सोनु इन्टरप्राइजेजका प्रोप्राइटर किरणदेवी गुप्तालाई मुद्दा चलाइएको हो।
राजश्व अनुसन्धान विभागका अनुसार उनीहरूलाई १४ करोड ९५ लाख ५१ हजार २७९ बिगो, २९ करोड ९१ लाख २ हजार ५५८ सजाय जरिवाना र ६१ लाख ४५ हजार ७१७ रुपैयाँ मालवस्तु जफत गरी कारबाही गर्न अदालतमा मागदाबी गरिएको छ।
यस्तै, मूल्य अभिबृद्धि करमा ४ करोड ४३ लाख ४२ हजार २७७, आयकर १ करोड २१ लाख ५२ हजार ३०, भन्सार महसुल ९ करोड ३० लाख ५६ हजार ९७२ रुपैयाँ असुल गर्न माग गरिएको छ।
सुन तस्करीमा संलग्न रौतहट गौर नगरपालिका ५ का अनुकेशकुमार साह र विजयकुमार साहलाई ८३ करोड १० लाख ४७ हजार ७२० रुपैयाँ राजश्व चुहावट र सोही बराबरको विदेशी मुद्रा अपचलन गरी १ अर्ब ६६ करोड २० लाख ९५ हजार ४४१ रुपैयाँ बिगो र सजायसमेत माग्दै अदालतमा मुद्दा दायर गरिएको छ।
त्यसैगरी, रसुवा नौकुण्ड गाउँपालिका १ का शेर ग्याल्बो घलेलाई ७ करोड ११ लाख ७६ हजार रुपैयाँ बिगो र सजाय माग गरी मुद्दा दायर गरिएको छ। उनलाई विदेशी मुद्रा अपचलनको कसुरमा रसुवा जिल्ला अदालतमा मुद्दा दायर गरिएको छ।
त्यस्तै, रुपन्देही बुटवल–४ का गौरीशंकर गुप्ता, भारतीय नागरिकहरू आशुतोष त्रिपाठी, अखिलेशकुमार पाण्डे, रमेश कुमार र सन्तोशकुमारलाई ६ लाख ८० हजार बिगो र ५ लाख ९३ हजार जरिवाना माग्दै रुपन्देही जिल्ला अदालतमा मुद्दा दायर गरिएको विभागले जनाएको छ।
