प्रधानमन्त्री केपी शर्मा ओलीले गुठीसम्बन्धी विधेयकमा एक डालोमा हजार हरेउ (सर्प) देखिने अवस्था भएपछि फिर्ता लिइएको बताएका छन्।
प्रतिनिधि सभा बैठकमा प्रमुख प्रतिपक्षी नेपाली कांग्रेसले अवरोध गरेपछि सम्बोधन गर्न नपाएका प्रधानमन्त्री ओलीले मंगलबार साँझ प्रधानमन्त्री तथा मन्त्रिपरिषद् कार्यालय सिंहदरबारमा पत्रकार सम्मेलन गर्दै विधेयक फिर्ता लिने निर्णय भएको बताएका हुन्।
‘जुन ढंगले निजी गुठी चलिरहेका छन् त्यसरी नै सञ्चालन हुनुपर्छ भन्ने नै हो, तर गुठी विधेयकको एउटा डालोभित्र हजार हरेउ देखापर्ने स्थिति बन्यो,’ प्रधानमन्त्रीले भने,‘लोकतन्त्रको जरा काट्ने कैचीँ चलमलाउन खोजेको देखेपछि मन्त्रीले आफूले दर्ता गर्नुभएको विधेयक फिर्ता लिनुभएको छ। म त्यो निर्णयको दृढ समर्थन गर्छु।’
भूमि सुधार मन्त्रीले केही सरोकारवालासँग परामर्श, छलफल गर्नुपर्ने र विज्ञको राय सुझाव लिनुपर्ने देखिएकाले विधेयक फिर्ता लिएको उनले बताए।
विधेयकमाथि छलफल गर्न संसद हुँदाहुँदै सडकमा आन्दोलन गरिएको ओलीको गुनासो छ।
‘माइतीघर त साँच्चैको माइतीघर भएको छ। मलाइ घरमा यस्तो गरे भनेर पनि माइतीघर गएर आन्दोलन गरिहाल्ने,’ प्रधानमन्त्रीले भने।
उनले नेपालमा संघर्ष, बलिदान, लडाइँ र संघर्ष गरेर आएको नेतृत्व भएको उल्लेख गर्दै जे गर्दा जनताको हित हुन्छ सरकारले त्यही गर्ने बताए।
