अख्तियार दुरूपयोग अनुसन्धान आयोगले साविकको पिपरा सिमरा गाउँविकास समितिका तत्कालीन सचिव विजयकान्त झालाई भ्रष्टाचार मुद्दा लगाएको छ।
विभिन्न शिर्षकमा गाविस विकासको लागि छुट्याइएको ६३ लाख एक हजार सातसय रूपैयाँ हिनामिना गरेको भन्दै अख्तियारले मंगलबार विशेष अदालतमा मुद्दा हालेको हो।
उनले विभिन्न आर्थिक वर्षमा चालू खर्च, पुँजीगत र सामाजिक सुरक्षा भत्ता वितरणमा गएको ६३ लाख रकम हिनामिना गरेको अख्तियारको ठहर छ।
उक्त रकम उनीबाट भराउन र त्यतिनै जरिवाना तिराउन अख्तियारले विशेषसँग माग गरेको छ। त्यसबाहेक उनलाई ६ देखि ८ वर्षसम्म कैद सजाय हुनुपर्ने पनि अख्तियारले माग गरेको छ।
त्यस्तै, आजै अख्तियारले भोजपुरको हतुवागढी गाउँपालिकामा कार्यरत इन्जिनियर मिसुहाङ किराँत र सोही कार्यालयका सव-इन्जिनियर नइन्द्र पारोहाङ्ग राईलाई घूस रकमसहित पक्राउ गरेको छ।
बाटो मर्मतको बिल भुक्तानी दिने प्रयोजनको लागि सेवाग्राहीसँग घूस मागेको सूचनाका आधारमा इटहरी कार्यालयबाट खटिएको अख्तियारको टोलीले उनीहरूलाई कार्यालय छेउबाटै पक्राउ गरेको हो।
इन्जिनियर किराँत ५० र सबइन्जिनियर पारोहाङ २० हजार घूस रकमसहित पक्राउ परेको अख्तियारले जनाएको छ।
