भारतीय प्रधानमन्त्री नरेन्द्र मोदीले प्रधानमन्त्री केपी शर्मा ओलीलाई धन्यवाद दिएका छन्। योग दिवसको अवसरमा शुक्रबार काठमाडौंमा भएको कार्यक्रममा सहभागी भएकोमा मोदीले ओलीलाई धन्यवाद दिएका हुन्।
जुन २१ मा मनाइने अन्तर्राष्ट्रिय योग दिवसका अवसरमा शुक्रबार प्रधानमन्त्री ओलीले ‘विश्व योग दिवसका अवसरमा सम्पूर्ण दिदीबहिनी तथा दाजुभाइहरूमा हार्दिक शुभकामना व्यक्त गर्दछु। प्राच्य संस्कृतिको अनुपम उपलब्धि योग साधना मार्फत मन, वचन र कर्मले एकै स्थानमा स्थित रही जीवनलाई स्वस्थ्य बनाउने सफलता मिलोस्, शुभकामना’ लेखेका थिए।
प्रधानमन्त्री ओलीले गरेको ट्वीटलाई मोदीले रिट्वीट गर्दै नेपालीमा लेखेका छन्, ‘योगको विशिष्टतालाई उजागर गर्नुका साथै व्यक्तिगत रुपमा उपस्थित भई योग दिवस कार्यक्रमलाई सुशोभित गर्नु भएकोमा प्रधानमन्त्री ओलीज्यूलाई धन्यवाद ज्ञापन गर्दछु।’
शिक्षा, विज्ञान तथा प्रविधि मन्त्रालयले सिंहदरबार शुक्रबार बिहान विश्व योग दिवसका अवसरमा कार्यक्रम गरेको थियो। उक्त कार्यक्रममा नेपालका भारतीय राजदूत मन्जीवसिंह पुरी पनि सहभागी भएका थिए।
