अख्तियार दुरूपयोग अनुसन्धान आयोगले स्थापनाको ४० वर्ष यताकै सबैभन्दा धेरै काम गरेको दाबी गरेको छ।
यो वर्ष अख्तियारले सबभन्दा धेरै मुद्दा दायर गरेर रेकर्ड राखेको अख्तियारका प्रवक्ता प्रदीपकुमार कोइरालाले बताए।
‘यो आर्थिक वर्षमा अख्तियारले ३ सय बढी मुद्दा दायर गरेको छ,’ उनले भने, ‘स्थापनाको ४० औं वर्षमा यसपालि सबैभन्दा धेरै भ्रष्टाचार मुद्दा अदालत पुर्याइएको हो।’
गत वर्ष अख्तियारले १ सय ९४ भ्रष्टाचारका मुद्दा अदालत पुर्याएको छ। यो वर्ष भने १० महिनामै ३ सय पुर्याएको हो।
यस वर्ष अख्तियारले आफैं सूचना संकलन र छानबिन गरेका मुद्दा बढी छन्। सरकारी सम्पत्ति हिनामिना गरेका सरकारी कर्मचारीबारे यस वर्ष अख्तियारले धेरै खोजिनीति गरेको छ।
जबकी गएको वर्ष नक्कली प्रमाणपत्र भएका र घुससहित रंगेहात पक्राउ परेका कर्मचारीका मुद्दा बढी थिए।
त्यस्ता मुद्दाको संख्या अहिले पनि उत्तिकै छन् तर सरकारी सम्पत्ति हिनामिनातर्फ अख्तियारले आफ्नो काम केन्द्रीत गरेको देखिन्छ।
सरकारी हिनामिना र अकुत सम्पत्तिसम्बन्धी ठूलो परिणामका मुद्दाको संख्या बढेको छ।
‘मापदण्ड त छैन तर ठूलो पदमा भएका व्यक्तिका मुद्दा र ठूलो रकम हिनामिनाका मुद्दालाई हामीले ठूला मुद्दा भन्ने एक किसिमको बुझाइ बनाएका छौं,’ उनले भने, ‘हुन त अख्तियारको नजरमा सबै भ्रष्टाचार उस्तै हुन्।’
आफ्नै पूर्वआयूक्त राजनारायण पाठकविरूद्ध घुस लिएको भन्दै मुद्दा लगायो। चाँगुनारायणस्थित इन्जिनियरिङ कलेजका अध्यक्ष लम्बोदर न्यौपानेसँग ७८ लाख घुस लिएको भिडियो सार्वजनिक भएपछि दुबैलाई अख्तियारले मुद्दा लगाएको हो।
आयल निगमका पूर्वकार्यकारी निर्देशक गोपालबहादुर खड्काले १८ करोड ६६ लाख अवैध रकम जम्मा पारेको मुद्दा यस वर्षको सबैभन्दा ठूलो हो।
राष्ट्र बैंकका पूर्वगभर्नर तिलक रावलसहित ३ जनालाई लगाइएको भ्रष्टाचार मुद्दा, पूर्वमन्त्री बद्री न्यौपाने जोडिएको मुद्दा पनि ठूला मुद्दामध्ये हुन्।
रावलले दश रूपैयाँको पोलिमर नोटको छपाईका क्रममा भ्रष्टाचार गरेको अख्तियारको दाबी छ।
रकमका हिसाबले यो वर्षको सबभन्दा ठूलो मुद्दा हो, पूर्वमन्त्री विक्रम पाण्डे जोडिएको सिक्टा सिचाइँ आयोजनाको मुद्दा।
पाण्डेको कम्पनीले आयोजना निर्माण गरेको थियो। उसले कमसल माटोमाथि नहर निर्माण गरेको भन्दै अख्तियारले २ अर्ब १६ करोड १७ लाखको भ्रष्टाचार मुद्दा लगाएको छ।
रकमको हिसाबले अर्को ठूलो मुद्दा हो, तत्कालिन महिला, बालबालिका तथा समाजकल्याण मन्त्री न्यौपानेसहितको मुद्दा। उनीहरूले भृकुटीमण्डपको जग्गा भाडामा दिने क्रममा ३१ करोड सरकारी हिनामिना गरेको अख्तियारको छानबिनबाट देखिएको थियो।
यातायात व्यवस्था विभागका पूर्वलेखापालले पाँच करोड अवैधसम्पत्ति थुपारेको मुद्दा पनि अख्तियारले अदालत पुर्याएको थियो।
यो वर्ष अख्तियारले घुससहित रंगेहात पक्राउ गरेका १०० मुद्दा छन्। अघिल्लो वर्ष यस्ता ५७ मुद्दा थिए।
यो वर्ष अख्तियारमा उजुरी पनि धेरै परे। २० हजारमध्ये ६ सय उजुरीमा विस्तृत अनुसन्धान अघि बढाएको प्रवक्ता कोइरालाले बताए।
‘६ सय विस्तृत अनुसन्धान गरेकामा ३ सय बढी त मुद्दा अदालत पुगिसके। यो भनेको ५० प्रतिशत हो। अघिल्लो वर्ष विस्तृत अनुसन्धान गरेका मध्ये ३७ प्रतिशत मुद्दा अदालत पुगेका थिए,’ उनले भने।
यो वर्ष अख्तियारले अर्को महत्वपूर्ण अध्ययन गर्यो। १४ वर्ष देखि अहिलेसम्मका सबभन्दा रूग्ण( थपिएको समयमा समेत पुरा नगर्ने) ठेक्का कुन आयोजनामा छन् भनेर पत्ता लगायो।
उसको अध्ययनबाट पूर्वाधारसँग सम्बन्धित ७ मन्त्रालय अन्तर्गतका ८ वटा निकायले सम्झौता गरेका एक हजार आठ सय ४८ ठेक्कापट्टा रूग्ण देखिएका थिए। सरकारले १ खर्ब १८ अर्ब लगानी गर्ने भनेका ती निर्माण आयोजनामा २४ अर्ब पेश्की रकम दिइसकेको थियो।
रूग्णमध्ये पनि अति रूग्ण ठेक्कासम्झौता बारे अहिले अख्तियारले विस्तृत अनुसन्धान अघि बढाएको प्रवक्ता कोइरालाले बताए।
