नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले अहिले सँगसँगै हिँडिरहेका राजनीतिक दलहरू छुट्टिनै नसक्ने गरी एकैठाउँमा उभिएको बताएका छन्।
चितवनको भरतपुर नगरपालिकाको चौंथो नगरसभा उद्घाटन गर्दै अध्यक्ष प्रचण्डले अहिलेको विशेष परिस्थितिमा प्रधानमन्त्री केपी शर्मा ओली, प्रमुख प्रतिपक्षी दल नेपाली कांग्रेसका सभापति शेरबहादुर देउवा र आफ्नो एकता बलियो रहेको बताएका हुन्।
‘अहिले हामीहरू एक अर्काबाट फुत्किन सक्ने अवस्थामा छैनौं, फुत्किनु भनेको अर्को दुर्घटना निम्त्याउनु हो,’ उनले भने।
उनले अहिले नै आफूलाई प्रधानमन्त्री नभन्न नगरसभाका सहभागीहरूसँग आग्रह पनि गरेका छन्।
कार्यक्रममा आएका केही सहभागीले उनलाई प्रधानमन्त्री भनेर सम्बोधन गरेपछि त्यसको जवाफमा उनले भने,‘मलाई हत्त न पत्त प्रधानमन्त्री नभनिदिनुस् न। तपाईंहरूले भन्दा त मुखमा आएको पनि जान बेर छैन।’
अर्को प्रसंगमा अध्यक्ष प्रचण्डले अबको पाँच वर्षभित्रमा चितवनवासीले धूलो देख्न नपर्ने गरी विकासको मिसन अघि बढेको पनि बताए।
उनले चिवतनमा निर्माणाधीन अन्तर्राष्ट्रिय क्रिकेट रंगशाला पैसाको अभावले नरोकिने स्पष्ट पारे।
‘चितवन क्रिकेट रंगशाला चितवनका लागि मात्रै हैन राष्ट्रका लागि नै बनाउन लागिएको हो। अहिले नीति तथा कार्यक्रममा निजी क्षेत्रबाट अगाडि बढाउन लागिएको रंगशालालाई निर्माणमा सरकारले प्रोत्साहन गर्नेछ भनेको यही रंगशालालाई हो। पैसाको कारणले रंगशाला निर्माणमा रोकिँदैन,’ अध्यक्ष प्रचण्डले भने।
प्रचण्डले भरतपुर भ्रष्टाचार नहुने महानगरपालिका बन्ने संभावना आफूले देखेको बताउँदै भने, ‘कम्तीमा पनि रेणुलाई त म राम्रोसँग चिन्छु नि।’
