सरकारका प्रवक्ता एवं सञ्चार तथा सूचना प्रविधि मन्त्री गोकुल बाँस्कोटाले पत्रकार संगीत स्रोता पक्राउबारे बचाउ गरेका छन्।
मन्त्रिपरिषद् बैठकले गरेका निर्णय सार्वजनिकपछि पत्रकारले सोधेको प्रश्नमा उनले संगीत स्रोता पक्राउबारे प्रहरीको बचाउ गरेका हुन्।
‘प्रहरीले अनुसन्धान गरिरहेको हुन्छ’, मन्त्री बाँस्कोटाले भने, ‘कुनै व्यक्ति उस्ताउस्तै पनि प्रहरीलाई लाग्न सक्छ।’
पुष्टि नभएपछि पत्रकार स्रोता छुटेको पनि उनले बताए।
पत्रकार संगीत स्रोतालाई बुधबार प्रहरीले प्रदर्शनीमार्गबाट पक्राउ गरको हो। प्रहरीले झुक्किएर पक्राउ गरेको भन्दै साँझ नै रिहा गरेको थियो।
विप्लव समूहको गतिविधि संविधानविरोधी भएको भन्दै सरकारले निस्तेज पार्ने उनले बताए।
पछिल्लो समय विप्लव नेकपाको सर्लाही जिल्ला इन्चार्ज कुमार पौडेल प्रहरी इन्काउन्टरमा मारिएको प्रसंगमा उनले, शान्ति सुरक्षामा खलल पुग्ने काम गर्ने र लोकतन्त्रलाई चुनौती दिनेलाई नछाडिने समेत उनले बताए।