गृहमन्त्री रामबाहदुर थापा ‘बादल’ले विप्लव समूहले अहिलेसम्म कुनै औपचारिक वार्ताको लागि प्रस्ताव नगरेको बताएका छन्।
‘हामीले वार्तामा आउनको लागि आह्वान गरिरहेका छौं तर विप्लव समूहले औपचारिक वार्ताको लागि कुनै प्रस्ताव गरेको छैन’, गृहमन्त्रालयको आर्थिक वर्ष ०७५/७६ को वार्षिक कार्यसम्पादन प्रगति र आगामी कार्यदिशा सम्बन्धमा आयोजित पत्रकार सम्मेलनमा बोल्दै गृहमन्त्री थापाले भने।
विप्लव समूहलाई राजनीतिक मूलधारमा ल्याउने प्रयास जारी नै रहेको पनि उनीहरू वार्ताको लागि निष्कर्षमा पुगिनसकेको उनले बताए।
राजनीतिक स्थायित्व र लोकतन्त्रको रक्षाको लागि विप्लव समूह चुनौती रहेको उनको भनाइ छ।
नेपालमा विगतमा भन्दा अहिले सुरक्षा व्यवस्था सुदृढ र सुरक्षित भएको उनको दाबी छ।
‘नेपालमा विगतमाभन्दा अहिले सुरक्षा व्यवस्था सुदृढ र सुरक्षित तर यतिमात्रमा सन्तुष्ट छैनौं।’
अहिलेसम्म विप्लव समूहका ६ सय कार्यकर्ता पक्राउ परिसकेको उनले जानकारी दिए।
फागुन ३० मा सरकारले विप्लव समूहका गतिविधि प्रतिबन्ध लगायो। त्यसपछि सरकारले विप्लवका कार्यकर्तालाई देशैभरबाट गिरफ्तार गर्न थालेको हो।
यो पनि :
आफ्ना कार्यकर्ता रिहा नभए योजनाबद्ध प्रतिरोध गर्ने विप्लवको चेतावनी
