सत्तारूढ नेपाल कम्युनिष्ट पार्टी (नेकपा) का प्रवक्ता नारायणकाजी श्रेष्ठले शिक्षा तथा स्वास्थ्य क्षेत्रलाई कमाउने धन्दाको रूपमा सञ्चालन गर्न नदिइने बताएका छन्।
सार्वजनिक शैक्षिक संस्थालाई नै सरकारले गुणस्तरीय बनाउन लागेको बताएका उनले निजी क्षेत्रलाई सेवाको भावबाट आएमात्रै सञ्चालन गर्न दिइने बताए।
गृह जिल्ला गोरखाको खोप्लाङस्थित अन्नपूर्ण माविमा निर्माण भएको भवन सोमबार उद्घाटन गर्दै उनले विद्यालयमा थप भवन बनाउन तथा पुस्तकालयका लागि आवश्यक पर्ने पुस्तक जुटाउन पहल गर्ने प्रतिवद्धता जनाए।
उनले आफूहरू निजी क्षेत्रको लगानीमा खुलेका विद्यालय बन्द गर्ने पक्षमा नरहेको पनि उनले बताए।
‘निजी शिक्षा बन्द गर्ने भनेको छैन,’ उनले भने, ‘सामुदायिक विद्यालयका शिक्षा गुणस्तरीय बनाउन नै हाम्रो मुख्य ध्यान छ। यसमा निजी क्षेत्रले आपत्ति मान्नु पर्दैन।’
शिक्षा तथा स्वास्थ्यलाई निजीकरण गर्दै पैसा कमाउने धन्दाका रूपमा चलाउन नदिइने उनले बताए।
‘सेवाको भावसहित निजी क्षेत्र आउनुहुन्छ भने स्वागत छ,’ उनले भने, ‘शिक्षा र स्वास्थ्यमा पैसा कमाउने धन्दा बनाउन दिँदैनौं। पैसा कमाउने हो भने उद्योग र व्यापार गर्नुस् आफूलाई पनि हुन्छ सरकारलाई पनि हुन्छ। शिक्षामा पैसा कमाउने खेल स्वीकार्य हुन्न।’
