नेपाल कम्युनिष्ट पार्टीका महासचिव विष्णु पौडेलले विकास निर्माणका काममा सरकारी निकाय र स्थानीयको निरन्तर अनुगमन र खबरदारी आवश्यक रहने बताएका छन्।
रुपन्देही जिल्लामा चाहिने विकास निर्माणका लागि कुनै पनि कसर बाँकी नराख्ने भन्दै बन्दै गरेका योजनाको गुणस्तर र समयमा पूरा गर्न भने स्थानीय स्तरबाट अनुगमन र खबरदारी गर्न आग्रह गरे।
बुटवल कालिका क्याम्पसको भवन शिलान्यास गर्दै महासचिव पौडेलले रुपन्देहीको विकासका लागि आफू सधैं अग्रभागमा रहेर काम गर्न तयार रहेको बताए। तर निर्माणका चरणमा रहेका आयोजनाहरूमा निरन्तर अनुगमन गर्न स्थानीयबाट अपेक्षा गरेको बताए।
बुटवल १० रामनगरस्थित साविक मानविज्ञान मावि रहेको जग्गामा करिब २० करोडको लागतमा सुविधा सम्पन्न क्याम्पस भवन निर्माण हुन लागेको हो।
बुटवल उपमहानगरपालिका (१० कालिकानगरमा रहेको कालिका मावि र मानविज्ञान मावि गतवर्ष गाभिएर कालिका मानविज्ञान मावि नामाकरण गरिएको थियो।
कार्यक्रममा प्रदेश सरकारका उद्योग पर्यटन वन तथा वातावरण मन्त्री लिला गिरी, बुटवल उपमहानगरपालिका प्रमुख शिवराज सुवेदी, क्याम्पस प्रमुख घनश्याम पाठक लगायतले सबैको सहयोग र सहकार्यबाट कालिका मानविज्ञान मावि जस्तै बुटवल कालिका क्याम्पसलाई पनि उत्कृष्ट बनाउन सकिने बताए। बुटवलको कालिका मावि सामुदायिक विद्यालय अन्तर्गत मुलुकमै नमूना मानिन्छ।
