संसदमा सत्तापक्ष र प्रतिपक्षको सिट छुट्याइएको हुन्छ। संसदमा सत्तापक्षका सांसदहरु सभामुखको दाहिनेतर्फ बस्छन् भने प्रतिपक्षका सांसदहरु सभामुखको देब्रेतर्फ बस्छन्। प्रधानमन्त्री र मन्त्रीको सिट भने सत्तापक्ष र प्रतिपक्षको ठीक बीचमा हुन्छ।
उपेन्द्र यादवको संघीय समाजवादी फोरम र बाबुराम भट्टराईको नयाँ शक्ति पार्टी एकीकरण भएसँगै उक्त पार्टीलाई निर्वाचन आयोगले मान्यता दिइसकेको छ। तर अझैपनि प्रतिनिधि सभामा भट्टराई प्रतिपक्षको बेञ्चमै बसिरहेका छन्। भट्टराई राजपा नेपालका सांसदसँग देब्रेतर्फ बस्छन्।
जबकी फोरमका सांसद सत्तारूढ दलको हैसियतमा सभामुखको दाहिनेतर्फ बस्छन्। पार्टी एकीकरणसँगै बाबुराम भट्टराई सत्तारूढ सांसद भएका छन्। तर उनी प्रतिपक्षको बेञ्चमा बसेको विषयमा मंगलबार नेकपाका सांसद विरोध खतिवडाले नियमापत्ती गरे।
खतिवडाले समाजवादी पार्टीका अध्यक्ष, सांसद तथा पूर्वप्रधानमन्त्रीसमेत रहेका बाबुराम भट्टराईलाई संसदमा बस्ने ठाउँ देखाइदिन सभामुखसँग माग गरे।
‘मैले सदनको नियमलाई ध्यानाकर्षण गर्न खोजेको हुँ। पूर्वप्रधानमन्त्री बाबुराम भट्टराई अहिले जहाँ बसिराख्नुभएको त्यही नै सही हो या संसदले व्यवस्थापन ठीक नगरेको हो या उहाँले एकतालाई सही गरेर इन्कार गरेको हो?,’ उनले भने, ‘सदनले बस्ने उपयुक्त ठाउँ देखाइदिनुपर्यो।’
सांसद खतिवडाले उठाएको प्रश्नको जवाफ दिँदै उपसभामुख शिवमाया तुम्बाहाम्फेले निर्वाचन आयोगबाट पत्र प्राप्त नभएकोले यथास्थानमै बस्ने ठाउँ उपलब्ध गराइएको जानकारी गराइन्।
उनले औपचारिक पत्र प्राप्त भएपछि बस्ने ठाउँबारे सदनले व्यस्थापन गर्ने बताइन्।
