नेपाल कम्युनिष्ट पार्टी (नेकपा)का महासचिव विष्णु पौडेलले पार्टी जिम्मेवारीबारे नेताहरूको इच्छा बुझेर प्रतिवेदन तयार गरिरहेका छन्।
पार्टीका ४ सय ४१ केन्द्रीय सदस्यमध्ये अध्यक्ष र महासचिवसहित १ सय ६९ जनाको जिम्मेवारी तोक्न बाँकी छ।
‘जिम्मेवारी दिन बाँकी रहेका अधिकांश कमरेडहरूलाई उहाँहरूको रूची र दक्षताबारे सोध्ने काम सकियो, एक/दुई दिनमा प्रतिवेदन पनि तयार हुन्छ होला,’ महासचिव पौडेलले सेतोपाटीसँग भने।
सचिवालय सदस्यहरूलाई प्रमुख बनाउने भनिएका महत्वपूर्ण विभागको नेतृत्वका लागि स्थायी समिति सदस्यहरूले आकांक्षा राखेको उनले बताए।
स्थायी र केन्द्रीय समिति सदस्यले दिएको सुझाव र राखेको रूचीलाई जस्ताको त्यस्तै समेटेर आफूले प्रतिवेदन तयार पार्ने पौडेले जानकारी दिए।
उनका अनुसार कतिपय नेताहरूले पार्टीका विभागको नेतृत्व सचिवालयका सदस्यले राख्न नहुने धारणा राखेका छन्।
सचिवालय सदस्यको जिम्मेवारी ठूलो हुने भएकाले उनीहरूले अनुगमन र समन्वयको काम गर्दा उचित हुने सुझाव उनीहरूको छ।
सेतोपाटीसँग कुरा गर्दै स्थायी समिति सदस्य वेदुराम भुषालले आफूले महासचिव पौडेललाई एक व्यक्तिलाई एक जिम्मेवारी दिनु पर्ने विधानको व्यवस्था पालना गरेर कामको बाँडफाँट गर्नु पर्ने र सचिवालय सदस्यले विभागको जिम्मेवारी लिन नहुने सुझाव दिएको बताए।
उनले सचिवालयका सदस्य विभागभन्दा माथिल्लो तहमा बस्नु पर्ने तर्क गरे।
‘पार्टी स्कुल विभागको नेतृत्वबारे मेरो सार्वजनिक दाबी नै छ,’ भुषालले भने ‘विभागको नेतृत्व सचिवालय सदस्यले तानातान गरेर बैठकलाई अनिर्णित बनाउन हुन्न।
अर्का स्थायी समिति सदस्य देवेन्द्र पौडेलले महासचिवले फोन गरेर आफ्नो रूचीबारे सोधेको र आफूले देशभर नेटवर्क हुने विभागमध्ये छानेर दिन आग्रह गरेको बताए।
उनले पार्टी स्कुल विभाग, संगठन विभाग, विद्यार्थी या सहकारी विभागमध्येको विभागमा आफ्नो रूची रहेको उनले बताए।
साउन १३ गते बसेको नेकपा सचिवालय बैठकले केन्द्रीय नेताहरूको रूची बुझेर प्रतिवेदन तयार पार्न महासचिव पौडेललाई जिम्मा दिएको थियो।
महासचिवले तयार पारेको प्रतिवेदन यही साउन २८ गते बोलाइएको बैठकमा पेस गर्नेछन्।
