ऊर्जा, जलस्रोत तथा सिँचाइ मन्त्री वर्षमान पुनले जुम्लामा विद्युतको वैकल्पिक व्यवस्थाको लागि सरकारले आवश्यक निर्देशन जारी गरिसकेको जानकारी गराएका छन्।
प्रतिनिधिसभाको बिहीबारको बैठकमा सार्वजनिक महत्वको विषयमा बोल्दै उनले जुम्लामा विद्युत् आपूर्तिमा आएको समस्याबारे आफूहरूलाई जानकारी प्राप्त भएलगत्तै वैकल्पिक प्रयास सुरू गरिएको उल्लेख गर्दै नेपाल विद्युत् प्राधिकरणको मर्स्याङ्दी जलविद्युत् केन्द्रमा रहेको ३ सय केबिए क्षमताको डिजेल जेनेरेटर पठाउने गरी आवश्यक निर्देशन र प्रक्रिया अघि बढाएको बताए।
जुम्लाका सांसद गजेन्द्र महतले जुम्लामा देखिएको विद्युत् आपूर्तिको समस्या सम्बोधनका लागि सम्बन्धित मन्त्री र विद्युत् प्राधिकरणले गम्भीरता नदेखाएको भन्दै मन्त्री र प्राधिकरणका कार्यकारी निर्देशक कुलमान घिसिङलाई ‘श्री ३ महाराज’को संज्ञा दिएका थिए।
उनले मन्त्री र प्राधिकरणका कार्यकारी निर्देशकले फोन पनि नउठाएको र भेटका लागि पनि समय नदिएको गुनासो गरेका थिए।
मन्त्री पुनले कर्णालीका सम्पूर्ण जिल्लाहरूलाई राष्ट्रिय प्रसारण लाइनमा आवद्ध गर्ने योजना सरकारले अघि बढाएको बताए।
जुम्लामा ३३ केवि प्रसारण लाइनका लागि यसै वर्ष दैलेख जुम्ला ट्रान्समिसन लाइनका लागि टेण्डर भएर छनोट पनि भइसकेको भन्दै उनले २ वर्षभित्र प्रसारणलाई बनिसक्ने बताए। साथै, उनले यसै वर्षको बजेटमा कर्णाली प्रदेश, सुदूरपश्चिम र प्रदेश नम्बर २ को पूर्वविद्युतीकरणको लागि बजेटको व्यवस्था गरिएको पनि उनले जानकारी गराए।
सांसद महतको जिज्ञासाको सम्बोधन गर्दै उनले हटलाइन सेवामार्फत् जुम्लाका उपभोक्ताबाट पावर प्लाण्ट बिग्रेको जानकारी आफूले पाएको तर सांसद महतले आफूसँग भेट्न गरेको प्रयासबारे जानकार नभएको स्पष्ट पारे। उनले आवेगमा नआई सामान्य ढंगले समस्याको ध्यानाकर्षण गराउँदा उपयुक्त हुने सुझाव समेत दिए।
उनले भने, ‘जुन आवेगमा राख्नु भयो त्यही उचाइको आक्रोशमा नराखेर सामान्य ढंगले ध्यानाकर्षण गराउँदा पनि हुन्थ्यो।’
उनले जुम्लामा २ सय ४० किलोवाटको विद्युत् प्राधिकरणको प्लाण्ट रहेको र सो प्लाण्ट उपभोक्ताको सहभागितामा सञ्चालन हुँदै आएको स्पष्ट पारे।
साथै उनले सोही उपभोक्ता समितिले नै आयोजनाको सञ्चालन मर्मत सम्भारसम्बन्धी सम्पूर्ण कामहरू गर्दै आएको र जुम्ला साना उपभोक्ता समितिको म्याद २०७७ मंसिरसम्म रहेको जानकारी समेत गराए।
स्थानीय पूर्वाधार कोषमार्फत् २६ लाख ४० हजार खर्च गरेर १ सय ६० किलोवाटको डिजेल प्लाण्ट लगाएर जुम्लामा आपतकालीन विद्युत् सप्लाइ सुरू भएको मिडियामा सुन्न आएको भन्दै उनले सांसद महतलाई धन्यवाद पनि दिए।
मन्त्री पुनलाई ४५ जना सांसदले प्रश्न गरेका थिए।
