प्रमुख प्रतिपक्षी दल नेपाली कांग्रेसले सत्तारूढ नेपाल कम्युनिष्ट पार्टी (नेकपा) ले तयार पारेको पार्टीको राजनीतिक प्रतिवेदनमाथि प्रश्न उठाएको छ।
बिहीबार पार्टी केन्द्रीय कार्यालय सानेपामा पत्रकार सम्मेलन गर्दै कांग्रेस प्रवक्ता विश्वप्रकाश शर्माले नेकपाले तयार पारेको राजनीतिक प्रतिवेदनमा कांग्रेसलाई हेर्ने दृष्टिदोष मात्रै भेटेको आरोप लगाए।
‘त्यो दस्तावेजमा कांग्रेसबारे इमान्दार दृष्टि होइन बरू दृष्टिदोष प्रस्तुत छ। दृष्टि उपर दृष्टिकोण व्यक्त गर्न मिल्छ दृष्टिदोषमाथि केवल दया मात्र। म विनम्र ढंगले दया व्यक्त गर्न चाहन्छु।’
कांग्रेसले प्रतिस्पर्धी शक्तिलाई सधैं मित्रशक्तिका रूपमा व्यवहार गर्दै आएको उनले बताए।
‘मित्रशक्तिका रूपमा कांग्रेसलाई हेर्ने मानसिकता विकास गर्न सकेको दिन सत्तारूढ नेकपाको दृष्टि दोषको समाधान हुनेछ,’ शर्माले भने।
निजामती विधेयक संविधानविपरीत
संसदको राज्य व्यवस्था तथा सुशासन समितिमा छलफलमा रहेको निजामती सेवाको गठन, सञ्चालन र संवादका सर्तसम्बन्धी विधेयकको दफा १२० को उपदफा ६ ले आधिकारिक ट्रेड युनियनबाहेक अन्य कुनै पनि युनियन वा निजामती कर्मचारीको समूहले हकहितका लागि माग पनि प्रस्तुत गर्न नपाउने व्यवस्था संविधानविपरीत रहेको कांग्रेसको भनाइ छ।
ट्रेड युनियनलाई सरकारले घुमाउरो ढंगले प्रतिवन्धित गर्न लागेको भन्दै प्रवक्ता शर्माले कांग्रेसले विधेयक विरोध गर्ने बताए।
कांग्रेसले गोंगबु बसपार्कमा जाइकासँग भएको सहमतिअनुसार नै अघि बढ्न माग गरेको छ। एक सय ६० रोपनी जग्गा गलत नियतका साथ दुरूपयोग भएको भन्दै कांग्रेसले छानबिन गर्न माग गरेको हो।
यो पनि :
क्षमा मागेर नेकपाले सरकारी जग्गाको पार्टी कार्यालय छोडोस्: कांग्रेस