प्रमुख प्रतिपक्षी दल नेपाली काँग्रेसले सरकारी जग्गा भोगचलनसम्बन्धि नियम विपरित धुम्बाराहीमा रहेको पार्टीको केन्द्रीय कार्यालय तत्काल हटाउन सत्तारुढ नेकपालाई आग्रह गरेको छ।
नेपाली कांग्रेसका प्रवक्ता विश्वप्रकाश शर्माले बिहीबार काठमाडौंमा पत्रकार सम्मेलन गरी सत्तारुढ केन्द्रीय कार्यालय जग्गाको भोगचलन सम्बन्धि नियम विपरित रहेको भन्दै आपत्ति जनाए।
नीति, नियम र नैतिकताको पाठ पढाउने राजनीतिक दलको केन्द्रीय कार्यालय नै नियम विपरितको ठाउँबाट संचालन भईरहेकोमा आफ्नो पार्टीलाई लज्जित र दुःखित बनाएको पनि प्रवक्ता शर्माको भनाई छ।
प्रवक्ता शर्माले नेकपाले सो कार्यालय त्यहाँ संचालन गरेर गम्भिर गल्ती गरेको दावी गर्दै क्षमतायाचना गर्नुपर्ने तर्क गरे।
नेकपाले पार्टीको राजनीतिक प्रतिवेदनमा आफ्नो पार्टीप्रति राखेको दृष्टिकोणप्रति पनि उनले आपत्ति जनाए। नेकपाले छपाईका लागि पठाएको राजनीतिक प्रतिवेदनमा आफ्नो पार्टीप्रति राखेको दृष्टिकोणमा दृष्टिदोष मात्रै रहेको उल्लेख गर्दै प्रवक्ता शर्माले लोकतन्त्रका लागि सँगै लडेको राजनीतिक दलले आफ्नो दलप्रति दृष्टिदोष राखेकोमा दया लागेको टिप्पणी गरे।
प्रवक्ता शर्माले नेकपाले आफ्नो पार्टीलाई हेर्ने दृष्टिकोणबारे पार्टीको केन्द्रीय कार्य समितिले आधिकारिक धारणा सार्वजनिक गर्ने बताए।
