अगस्ट ५ मा भारतले जम्मु कस्मिरलाई विशेष मान्यता दिने संविधानको धारा ३७० खारेज गरेसँगै पहिलो पटक पाकिस्तानी विदेश मन्त्री र चिनियाँ विदेश मन्त्री भेट गरेका छन्।
बेइजिङमा आपतकालीन यात्रामा भएको भेटमा चिनियाँ विदेश मन्त्री वाङ यीले पाकिस्तानी विदेश मन्त्री शाह महोम्मद कुरेशीलाई कस्मिरको विषयमा चीनले पाकिस्तानलाई सहयोग गर्ने बताएका छन्।
भेटमा विदेश मन्त्री कुरेशीले पाकिस्तानको अहिले स्थितिको बारे र अब आउने सम्भावित परिस्थितिको बारेमा जानकारी गराएका थिए। र यस विषयमा चीनले सक्दो सहयोग गर्ने अपेक्षा उनले गरे।
‘कस्मिरको विषयमा चीनको विशेष चासो छ’, वाङले भने,‘ चीनले आफ्नो वैध अधिकार र हितको रक्षाको निम्ति पाकिस्तानलाई सदैव सहयोग गर्ने र अन्तर्राष्ट्रिय मञ्चमा पाकिस्तानको न्यायको निम्ति मध्यस्तता गर्ने छ।’
वाङले भारत र पाकिस्तान दुवै चीनका हितैसी छिमेकी समेत भएको बताए।
गत सोमबार भारत प्रशासित कस्मिरलाई दिइएको प्रदेशको मान्यता हटाएर भारतले केन्द्रशासित दुई क्षेत्र बनाउने निर्णय गरेको थियो। साथै जम्मु कस्मिर र लद्दाखलाई दुई केन्द्रशासित बनाउने निर्णय गरेको थियो। साथै कस्मिरलाई विशेष मान्यता दिने संविधानको धारा ३७० पनि खारेज गरेको थियो।
गत बिहीबार साँझ राष्ट्रका नाममा सम्बोधन गर्दै प्रधानमन्त्री नरेन्द्र मोदीले परिवर्तित व्यवस्थाले जम्मु कस्मिरको विकास हुने दाबी गर्दै पछि फेरि प्रदेशको मान्यता दिने बताएका थिए।
छिमेकी पाकिस्तानले भने भारतको उक्त निर्णय एकलौटी र गैरकानुनी भएको बताउँदै आएको छ।