संघीय संसदका सांसदले प्रधानमन्त्रीलाई प्रश्न सोध्न पाएजस्तै अब प्रदेश नम्बर २ प्रदेशसभा सांसदले पनि मुख्यमन्त्रीलाई सिधा प्रश्न सोध्न पाउने भएका छन्।
मुख्यमन्त्री तथा मन्त्रिपरिषद् कार्यालयबारे कुनै प्रश्न भए सांसदले सिधै मुख्यमन्त्रीलाई संसदमा प्रश्न सोध्न सक्छन् र मुख्यमन्त्रीले जवाफ दिनुपर्नेछ।
प्रदेश नम्बर २ प्रदेशसभा सभामुख सरोजकुमार यादवले प्रदेशसभा सञ्चालन नियमावली संशोधन गरेपछि मुख्यमन्त्रीलाई प्रश्न सोध्न सक्ने बाटो खुलेको जानकारी दिए।
‘शनिबार बसेको बैठकले प्रदेशसभा सञ्चालन नियमावलीमा चार/पाँच वटा कुरा संशोधन गरेको छ,’ सभामुख यादवले सेतोपाटीसँग भने, ‘संघीय संसदमा सांसदले सोधेको प्रश्नमा प्रधानमन्त्रीज्यूले जवाफ दिनुहुन्छ। तर प्रदेशमा त्यो नियम थिएन त्यसैले संशोधन गरेर प्रश्न सोध्न सकिने व्यवस्था गरिएको हो।’
सभामुख यादवका अनुसार प्रदेशको स्थायी राजधानी र नाम अब छिट्टै टुंगो लाग्छ।
‘सांसदहरूले प्रदेशको संभावित नाम र राजधानी लेखेर निवेदन दर्ता गराउन सक्छन्,’ उनले भने, ‘आज सूचना निकाल्छु। भदौ ५ गतेसम्म इच्छुक सांसदले प्रदेशको नाम र राजधानी प्रस्ताव गर्न सक्छन्।’
नाम र राजधानी प्रस्ताव गर्नका लागि एक जना प्रस्तावक र दुई जना समर्थक सांसद आवश्यक पर्ने उनले जानकारी दिए।
भदौ ६ गते कार्य व्यवस्था परामर्श समितिको बैठक राखेर त्यसपछि नाम र राजधानीका सम्भावित नामबारे छलफल सुरू गरिने उनले बताए।
‘प्रदेशको नाम र राजधानी तोक्नका लागि छलफल गर्न बेग्लै समिति गठन गरिन्छ,’ उनले सेतोपाटीसँग भने, ‘सकेसम्म सहमतिबाटै नाम र राजधानी तोक्छौं।’
सहमति नै हुन सकेन भने दुई तिहाइ मतबाट केन्द्र र नाम तोकिने उनले जानकारी दिए।
कर्णाली, गण्डकी र सुदूरपश्चिम प्रदेशले नाम र राजधानी तोकिसके पनि प्रदेश १, २, ३ र ५ ले नाम र राजधानी तोक्न सकेका छैनन्