भारतका विदेश मन्त्री एस जयशंकर आइतबार चीन जाँदैछन्।
भारत-चीन उच्चस्तरीय संयन्त्रको दोस्रो बैठकमा भाग लिन उनी बेङजिङ जान लागेका हुन्।
गत वर्ष स्थापना भएको उक्त संयन्त्रको दोस्रो बैठकको मिति पूर्वनिर्धारित हो। तर भारत सरकारले गत साता जम्मु कस्मिरबारे लिएको निर्णयपछि जयशंकरको बेइजिङ भ्रमणलाई निकै चासोका साथ हेरिएको छ। किनकी जम्मु कस्मिरको केही भाग चीनको नियन्त्रणमा छ।
चीनले भारतको पछिल्लो कदममा आपत्ति जनाइसकेको छ।
यसअघि शुक्रबारमात्र पाकिस्तानका विदेश मन्त्री साह मोहम्मद कुरेसी बेइजिङ पुगेका थिए। पाकिस्तानले संविधानको धारा ३७० खारेज गर्ने र जम्मु कस्मिरलाई दुई केन्द्रशासित क्षेत्रमा बाँड्ने भारतको निर्णय एकपक्षीय र गैरकानुनी भएको बताएको छ। उसले यो विषय संयुक्त राष्ट्र संघको सुरक्षा परिषदमा लैजाने तयारी गरेको छ।
सुरक्षा परिषदमा आफ्नो पक्षमा चीनको सहयोग जुटाउन कुरेसी बेइजिङ पुगेका थिए। बेइजिङमा उनले समकक्षी वाङ यीसँग भेटवार्ता गरेका छन्।
शनिबार इस्लामावादमा पत्रकारहरूसँग कुरा गर्दै विदेशमन्त्री कुरेसीले राष्ट्र संघमा पाकिस्तानलाई चीनले सहयोग गर्ने प्रतिवद्धता व्यक्त गरेको बताए। त्यसका लागि चीनले आफ्ना न्यूयोर्कस्थित प्रतिनिधिलाई पाकिस्तानी प्रतिनिधिसँग समन्वय गर्न पनि भनेको कुरेसीले दाबी गरे।
समाचार संस्था रोयटर्सका अनुसार सुरक्षा परिषदका अस्थायी सदस्यहरू इन्डोनेसिया र पोलान्डको समर्थन जुटाउन कुरेसीले ती देशको पनि भ्रमण गर्न लागेका छन्।