एक सातादेखि कर्फ्यूजस्तै अवस्थामा भारतको जम्मु कस्मिरमा इदका अवसरमा प्रशासनले प्रतिबन्ध खुकुलो पार्ने अपेक्षा गरिएको थियो, तर त्यहाँ प्रतिबन्ध खुकुलो हुनुको साटो सुरक्षा व्यवस्था झन् कडा पारिएको छ।
भारतीय सञ्चारमाध्यमहरूले जनाएअनुसार प्रशासनले आइतबार साँझदेखि जम्मु कस्मिरमा सुरक्षा व्यवस्था कडा पारेको छ। मानिसहरूको आवातजावातलाई निगरानी गरेको छ।
श्रीनगरका अधिकांश मुख्य मस्जिदहरू बन्द छन्। मानिसहरूले छिमेका रहेका साना मस्जिदमा गएर प्रार्थना गरेका छन्।
नजरबन्दमा रहेका पूर्वमुख्यमन्त्रीहरू ओमार अब्दुल्ला र मेहबुबा मुफ्तीलाई नजिकैको मस्जिदमा जान अनुमति दिइएको अधिकारीहरूले जनाएका छन्।
गत शुक्रबारदेखि जम्मु कस्मिरमा लगाइएको प्रतिबन्ध केही खुकुलो पारिएको थियो। शनिबार श्रीनगरमा फाट्टफुट्ट प्रदर्शन भएपछि हिंसा भड्किने भन्दै प्रशासनले प्रतिबन्ध थप कडा बनाएको हो।
सरकारी समाचार संस्था प्रेस ट्रस्ट अफ इन्डियाले इदका लागि डेलिभरी भ्यानले सब्जी, तरकारी, कुखुराको मासु, अण्डालगायत सामग्री घर घरमा पुर्याइहेको छ।
जम्मु कस्मिरमा अघिल्लो आइतबारदेखि टेलिफोन, मोबाइल र इन्टरनेट बन्द गरिएको छ। प्रशासनले ठाउँ ठाउँमा बुथ राखेर मानिसहरूलाई आफन्तसँग कुरा गर्न दिइरहेको पिटिआईले उल्लेख गरेको छ।
यसअघि गत शनिबार कर्फ्यूबीच श्रीनगरमा प्रदर्शन भएका समाचार आएका थिए। बिबिसी उर्दू सेवाले प्रदर्शनको भिडिओ सार्वजनिक गरेको थियो। भारतको गृह मन्त्रालयले भने ती मिडिया रिपोर्टहरू बढाइचढाइ गरिएको दाबी गरेको छ।
गत सोमबार नरेन्द्र मोदी सरकारले जम्मु कस्मिरलाई विशेष मान्यता दिने भारतको संविधानको धारा ३७० खारेज गरेको थियो। योसँग जम्मु कस्मिर प्रदेश खारेज गरी दुई केन्द्रशासित क्षेत्रमा बाँडेको थियो।
भारतको एकमात्र मुस्लिम बहुल राज्यमा भएको यो परिवर्तनको विरोध हुन सक्ने ठानेर सरकारले त्यहाँ व्यापक सुरक्षाकर्मी परिचालन गरेको छ भने टेलिफोन, इन्टरनेट, बजार, विद्यालय बन्द गराएको छ।
