९ दिने सिंगापुर बसाईं सकेर फर्किएका प्रधानमन्त्री केपी शर्मा ओलीले राजनीतिक परामर्श तीब्र पारेका छन्।
सोमबार नेपाल फर्किएलगत्तै भेटघाट सुरु गरेका प्रधानमन्त्री ओलीले अहिले पूर्व एमालेका शीर्ष नेताहरुसँग छलफल गरिरहेका छन्।
उनीहरुसँग कुराकानी सकिएपछि नेकपाका अर्का अध्यक्ष पुष्पकमल दाहाल ‘प्रचण्ड’सँग छलफल गर्ने र पार्टी एकीकरण प्रक्रियाका बाँकी रहेका विषयहरु टुंगो लगाउने प्रधानमन्त्रीको तयारी रहेको बालुवाटार श्रोतले बताएको छ।
यसअघि प्रधानमन्त्री ओली र अर्का अध्यक्ष प्रचण्डबीच सोमबार साँझ पार्टी एकीकरणका बाँकी मुद्दा किनारा लगाउने उपायका विषयमा छलफल भएको थियो। उनीहरुबीच छलफल भएपछि अझै केही आन्तरिक सहमति जुटाउनुपर्ने भन्दै मंगलबारका लागि डाकिएको सचिवालय बैठक सरेको सूचना बाँकी सचिवालय सदस्यहरुलाई पठाइएको थियो।
सोही आन्तरिक सहमति जुटाउने प्रयासस्वरुप पूर्व एमालेका शीर्ष नेताहरु बालुवाटारमा भेला भएका हुन्।
‘अब प्रधानमन्त्रीज्यू लगालग बैठक गरेर सबै कुरा टुंग्याउने मुडमा हुनुहुन्छ, त्यसैले फर्किनेबित्तिकै छलफल तीब्र पार्नुभएको हो।’ प्रधानमन्त्रीको नीजि सचिवालयलका एक सदस्ययले सेतोपाटीसँग भने।
यसअघि साउन १३ गते बसेको नेकपा सचिवालय बैठकले बाँकी रहेको एकीकरण प्रकृयाका विषययमा जम्मेवारी पाउन बाँकी रहेका केन्द्रीय नेताहरुसँग छलफल गर्ने निर्णय गरेको थियो। पार्टीका अध्यक्ष प्रचण्ड र महासचिव विष्णु पौडेलले नेताहरुको चाहना र योग्यताका विषयमा छुट्टाछुट्टै परामर्श गरेका थिए।
महासचिव पौडेलले अधिकांश नेताहरुसँग छलफल गरेर उनीहरुको चाहनासहितको प्रतिवेदनपनि तयार पारेका छन्।
महासचिवसँग कुराकानीको सिलसिलामा धेरैजसो स्थायीसमिति सदस्यहरुले सचिवालयका नेताहरुले विभाग प्रमुखको जिम्मेवारी लिन नहुने र त्यसका लागि स्थायी समिति सदस्यहरु सक्षम रहेको बताएका थिए।
महासचिव पौडेलले सो प्रतिवेदन सचिवायल बैठकमा बुझाउनुअघि प्रधानमन्त्री ओलीलाई हिजै जानकारी गराइसकेका छन्।
३३ वटा विभाग मध्ये १८ वटा पूर्व एमाले र १४ पूर्व माओवादीका नेताहरुलाई दिने सहमति भए पनि पार्टी स्कुल स्कुल विभागको नेतृत्वको विवाद नसुल्झिएपछि नेकपामा विभागमा बस्न चाहने केन्द्रीय नेताहरुको जिम्मेवारी टुंगो नलागेको हो।
प्रधानमन्त्री केपी शर्मा ओली सचिवालय सदस्य इश्वर पोखरेललाई स्कुल विभागको जिम्मेवारी दिने पक्षमा छन् भने अर्का अध्यक्ष प्रचण्ड नारायणकाजी श्रेष्ठलाई स्कुल विभाग प्रमुख बनाउन चाहन्छन्।