कर्णाली प्रदेशका मुख्यमन्त्री महेन्द्रबहादुर शाही सात दिने गृह जिल्ला कालिकोट भ्रमणमा छन्।
सत्तारूढ पार्टी नेपाल कम्युनिष्ट पार्टी (नेकपा) का विभिन्न कार्यक्रम र सरकारी विद्यालयहरूमा आयोजना गरिएका कार्यक्रममा भाग लिन तीन दिनदेखि मुख्यमन्त्री शाही कालिकोटका गाउँमा छन्।
कर्णाली प्रदेशका प्रमुख सचिव केवलप्रसाद भण्डारीका अनुसार मुख्यमन्त्री शाही लामो समयपछि गृह जिल्ला गएका हुन्।
‘जिल्ला नजानुभएको लामो समय भएको थियो। अहिले यहाँ धेरै काम पनि नभएकोले जिल्लातिर हुनुहुन्छ,’ भण्डारीले भने, ‘कालिकोटसम्म गाडीमा जानुभएको हो। त्यहाँबाट गाउँ-गाउँ हिँडेरै।’
मुख्यमन्त्री शाही धेरै हेलिकप्टर चढ्ने गरेको भनेर आलोचनामा पनि पर्ने गरेका छन्।
मुख्यमन्त्री शाहीसँगै रहेका जिल्ला प्रहरी कार्यालय कालिकोटका प्रहरी नायब उपरीक्षक विनोद शर्माले सडक नभएकोले हिँडेरै एक गाउँदेखि अर्को गाउँसम्म गएको बताए।
मुख्यमन्त्री शाही गएका कार्यक्रम नजिक दिनदिनै बम विस्फोटका आवाज सुनिने गरेका छन्।
मुख्यमन्त्री सहभागी कार्यक्रम भइराखेका ठाउँ नजिकै बुधबार र बिहीबार बम विस्फोट भए।
बम विस्फोट गराउने समूहको पहिचान नभए पनि नेत्रविक्रम चन्द नेतृत्वको विप्लव समूहले पड्काएको हुनसक्ने अनुमान प्रहरीको छ।
बिहीबार मुख्यमन्त्री शाही सहभागी हुने कार्यक्रमलाई लक्षित गरेर दुइटा बम विस्फोट भएको छ।
प्रनाउ शर्माका अनुसार दुई पटक ठूलो आवाज सुनिएको थियो।
‘विस्फोटबाट कुनै क्षति भएको छैन,’ उनले सेतोपाटीसँग भने, ‘हिजो र आज बम पड्किएको आवाज सुनियो।’
मुख्यमन्त्री शाही रास्कोट सडक उद्घाटन कार्यक्रमका लागि जाँदै गर्दा कृषि क्याम्पस नजिकै बम विस्फोट भएको उनको भनाइ छ।
बुधबार मुख्यमन्त्री पचालझरना गाउँपालिकाको परिषद उद्घाटन समारोहमा सहभागी हुँदा पनि बम विस्फोट भएको थियो।
यो पनि:
कालिकोटमा मुख्यमन्त्री शाही सहभागी कार्यक्रम स्थलनजिकै बम विष्फोट
