नेपाल कम्युनिष्ट पार्टी नेकपाको सचिवालय बैठक आज बस्दैछ। यसअघि लगातार दुई पटक स्थगित भएको बैठक आज बस्न लागेको हो। बैठक दिउँसो ३ बजे बस्ने भनिए तापनि ५ बजेको लागि सरेको छ। आन्तरिक तयारी भइरहेकोले समय सारिएको बताइएको हो।
बैठक साँझ ५ बजे प्रधानमन्त्रीको सरकारी निवास बालुवाटारमा सुरू हुनेछ।
सचिवालय बैठक सुरु हुनुअघि बिहान नौ बजेदेखि प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डले छलफल गरेका छन्।
विहान नौबजेदेखि नै आन्तरिक छलफलमा रहेका अध्यक्षहरुले सचिवालय सदस्य रामबहादुर थापा ‘वादल’ र महासचिव विष्णु पौडेललाई पनि बैठकमा सहभागी गराएका छन्।
नेकपाले पार्टी विभागको नेतृत्व, जनवर्गीय संगठनका इन्चार्ज तथा सहइन्चार्ज, विभिन्न आयोगहरु, परिषद् र जेष्ठ नागरिक मञ्चको नेतृत्वको टुंगो लगाउन बाँकी छ। छलफल पेचिलो बन्दै गएपछि पार्टी स्कुल विभाग प्रमुखको जिम्मेवारी अहिलेका लागि दुई अध्यक्षले नै राख्नसक्ने संभावना रहेको सचिवालय स्रोतले जनाएको छ।
‘अरु विभागको नेतृत्वमा खासै विमति नरहेकाले आजको सचिवालय बैठकबाट एकीकरण प्रक्रियाको बाँकी काम टुंगिन पनि सक्छ’ स्रोतले सेतोपाटीसँग भन्यो। नीति तथा प्रतिष्ठानसहित ३३ विभाग मध्ये १८ पूर्व एमाले र १४ पूर्व माओवादीको भागमा परेको छ। दुवै पक्षको दावीका कारण विवादमा रहेको स्कुल विभागको नेतृत्वबारे नेकपाको नेतृत्व अहिलेसम्म अनिर्णित नै छ।
