प्रधानमन्त्री केपी शर्मा ओली बिरामी परेका छन्।
टाउको भारी हुने र आंशिक ज्वरो आउने भएपछि उनलाई डाक्टरहरूले आराम गर्न सल्लाह दिएको प्रधानमन्त्रीको निजी सचिवालयले जनाएको छ।
सिंगापुरमा नौ दिनसम्म उपचार गराएका प्रधानमन्त्री ओली गत सोमबार नेपाल फर्किएलगत्तै राजनीतिक छलफल र परामर्शमा व्यस्त भएका थिए।
सिंगापुरको नेशनल युनिभर्सिटी हस्पिटलमा स्वास्थ्य परीक्षण गराएका प्रधानमन्त्री ओलीले नेपाल फर्किएपछि आफू स्वस्थ भएको भन्दै स्वास्थ्यस्थितिबारे चिन्ता नलिन आग्रह गरेका थिए।
'तर आज (बिहीबार) बिहानदेखि उहाँले केही असहज महसुस गर्नुभयो, टाउको दुख्ने र बेलाबेलामा ज्वरो पनि आउने भएपछि आजका लागि तय भएको सचिवालय बैठक पनि स्थगित गर्नुपर्यो,' प्रधानमन्त्रीको सचिवालयका एक सदस्यले सेतोपाटीसँग भने।
बैठक स्थगित भएको सूचना दिएका नेकपाका प्रवक्ता नारायणकाजी श्रेष्ठले पनि प्रधानमन्त्रीलाई ज्वरो आएकाले बैठक औपचारिक रूपमै सुरू नभएको बताएका थिए।
बिरामी भए पनि बिहीबार दिनभर नेकपाका अर्का अध्यक्ष पुष्पकमल दाहाल प्रचण्ड, सचिवालय सदस्य रामबहादुर थापा र महासचिव विष्णु पौडेलसँग प्रधानमन्त्री ओलीले परामर्श गरेका थिए।
मृर्गौला प्रत्यारोपण गरेका प्रधानमन्त्री ओली यसअघि नियमित चेकजाँचका लागि थाइल्याण्डको बैंकक जाने गर्थे। यसपालि उनी सिंगापुर गएका थिए।
साउन १८ गते सिंगापुर गएका ओली २४ गते स्वदेश फर्किने कार्यक्रम थियो। तर स्वास्थ्य परीक्षणका रिपोर्ट आउन समय लागेकाले उनको सिंगापुर बसाइ लम्बिएको थियो।
प्रधानमन्त्री ओलीको के-के परीक्षण भएको हो र तिनको रिपोर्ट के आयो भन्नेबारेमा खुलाइएको छैन। सोमबार स्वदेश फर्किएका प्रधानमन्त्री ओलीले विमानस्थलमा पत्रकारहरूलाई आफू ठीक भएको बताएका थिए।
