नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ र बरिष्ठ नेता माधवकुमार नेपालबीच परामर्श भएको छ।
आइतबार बिहान राजधानीमा करिब आधा घन्टा भएको छलफलमा नेकपा सचिवालयको पछिल्लो बैठक, वरीयतालगायत विषयमा नेता नेपालको असन्तुष्टि र त्यसलाई कसरी सम्बोधन गर्ने भन्ने विषयमा छलफल भएको स्रोतले सेतोपाटीलाई जानकारी दियो।
गत शुक्रबार बसेको नेकपा सचिवालय बैठकमा पार्टीका बरिष्ठ नेता झलनाथ खनालले बरिष्ठ नेताको एक नम्बरमा आफूलाई राख्नुपर्ने बताएका थिए। दुई अध्यक्षहरू पनि त्यसमा सकरात्मक देखिएका थिए।
नेता नेपालले उक्त विषयमा आपत्ति जनाएपछि अर्को बैठकमा छलफल गर्ने भन्दै एजेण्डा पछि सारिएको थियो।
सम्भवतः उक्त विषयमा आइतबार दिउँसो बस्ने सचिवालय बैठकमा छलफल हुनेछ।
बिहान भएको छलफलमा प्रचण्ड र नेपालबीच बरिष्ठताको विषयसँगै पोलिटब्यूरो गठनमा देखिएको समस्याबारेपनि छलफल भएको स्रोतले बताएको छ।
‘पार्टी विधानमै भएको पोलिटब्युरो गठनका विषयमा कुनै चासो नदेखाउने तर विधानमै नभएको उपाध्यक्ष पद सृजना गरेर व्यक्ति व्यक्ति रिझाउने अध्यक्षद्वयको प्रवृत्तिप्रति पनि नेपाल असन्तुष्ट हुनुहुन्छ,’ नेपालनिकट स्रोतले सेतोपाटीलाई भन्यो, ‘उहाँहरूबीच पार्टीको पोलिटब्युरो गठनका विषयमा पनि छलफल भएको हुनसक्छ।’
नेकपाको विधानमा दुई अध्यक्ष, दुई वरिष्ठ नेता, एक प्रवक्ता र महासचिव हुने प्रावधान छ।
नेकपाको सचिवालय बैठक आज बस्दैछ। दिउँसो ४ बजे प्रधानमन्त्री निवास वालुवाटारमा बस्ने बैठकमा पार्टी एकता प्रक्रियाका बाँकी काम सक्ने गरी छलफल हुने नेकपाले जनाएको छ।
नेकपाले अब २२ जनवर्गीय संगठनहरुको इन्चार्ज र सहइन्चार्ज, विशेष कमिटी, केन्द्रीय अनुशासन आयोग, लेखापरीक्षण आयोग,निर्वाचन आयोग, राष्ट्रिय परिषद्, केन्द्रीय सल्लाहकार परिषद्, ज्येष्ठ कम्युनिष्ट मञ्चलगायतको नेतृत्व टुंग्याउन बाँकी छ।