जिल्ला प्रहरी कार्यालय सल्यानले विप्लवका २ कार्यकर्तासहित ३ जनालाई पक्राउ गरेको छ ।
जिल्लाको बागचौर नगरपालिका वडा नं. ५ निवासी १९ बर्षीय महेशकुमार विक, शारदा नगरपालिका वडा नं. १३ स्यानीखाल निवासी १८ बर्षीय सुरेश भारती पक्राउ परेका छन् ।
उनीहरु दुबैजना विप्लव निकटको विद्यार्थी संगठनका जिल्ला तहका नेता रहेको प्रहरीले बताएको छ । उनीहरु दुबैजना केहीदिन पहिले सल्यानस्थित खैरावाङ मन्दिरको जग्गा कब्जा गर्ने कार्यमा संलग्न भएको प्रहरीको आरोप छ ।
मन्दिरको जग्गामा उक्त पार्टीको झण्डा र व्यानर गाडेर कब्जा गरिएको सूचना दिइएको थियो । त्यसमा उनीहरु दुबै जनाको संलग्नता रहेको जिल्ला प्रहरी कार्यालय सल्यानको दाबी छ ।
त्यसैगरी प्रहरीले त्रिवेणी गाउँपालिका वडा नं. ४ घर भई हाल जिल्लाको शारदा नगरपालिका वडा नं. १ श्रीनगर बजारमा केसी डिजिटल आर्टस सञ्चालन गर्दै आएका २५ बर्षीय हिरा केसीलाई पनि पक्राउ गरेको छ । केसीले विप्लव समुहलाई आवश्यक ब्यानर तथा झण्डा तयार पारी दिने गरेको हुँदा पक्राउ गरिएको हो।
परिक्षादिन गएका विद्यार्थी पक्राउ गर्नु गलत
विप्लव नेतृत्वको नेकपा सल्यानले भने परिक्षा दिन गएका विद्यार्थी नेताहरुलाई प्रहरीले पक्राउ गरेको भन्दै आपत्ति जनाएको छ ।
एसईइको जारी पुरुक परिक्षा दिन गएका विक र भारतीलाई प्रहरीले परिक्षा दिन नदिए पक्राउ गरेको एकजना नेताले फोनमा बताए ।
‘युवाहरुको भविस्य बर्बाद पार्ने कार्यमा राज्य उद्धत छ ।
परिक्षा दिन गएका विद्यार्थीलाई परिक्षा दिनु पूर्व नै पक्राउ गर्नु र परिक्षा दिन समेत नदिनुले राज्यको नियत स्पष्ट भएको छ,’ एक नेताले भने ।
उनीहरुलाई शिवराज मावि श्रीनगर परिक्षा केन्द्रवाट पक्राउ गरिएको उक्त पार्टीले जानकारी दिएको छ ।