मदन भण्डारी विश्वविद्यालय विधेयकबारे दुई पूर्वस्वास्थ्य मन्त्रीबीच संसदमा सवाल जवाफ भएको छ।
प्रतिनिधि सभाको बिहीबारको बैठकमा नेपाली कांग्रेसका सांसद गगन थापाले मदन भण्डारी विश्वविद्यालय खोल्ने गरी सरकारले ल्याएको विधेयक रोक्न माग गरे।
विधेयकमाथिको सैद्धान्तिक छलफलको क्रममा थापाले संघ र प्रदेशले विश्वविद्यालय चलाउन सक्ने संविधानको प्रावधान भएको अवस्थामा पहिला उक्त विषय स्पष्ट गर्न माग गरे।
उनले नेताहरूको नाममा खुलेका फाउण्डेसनको दुई जना विश्वविद्यालयमा रहने व्यवस्था गलत भएको बताए।
उनले मदन भण्डारीजस्तै गिरिजाप्रसाद कोइराला र महेन्द्र नारायण निधिको नाममा समेत फाउण्डेसन रहेको र सरकारले ल्याएको विधेयकले नेताहरूको नाममा विश्वविद्यालय खोल्ने बाटो खोलिएको बताए।
मदन भण्डारी फाउण्डेसनका ‘दुई जना भन्नुको साटो सिधै पूर्वएमालेका दुई जना बस्ने’ भनेर विधेयकमा राख्नु पर्ने उनको सुझाव छ।
‘प्रत्येक नेताको नाममा सरकारको सम्पत्तिमा कलेज खोल्ने बाटो खोल्यौं,’ थापाले भने, ‘यो विधेयक रोक्न म आग्रह गर्न चाहन्छु।’
नेपालमा विश्वविद्यालयहरू बर्बाद भएको उल्लेख गर्दै थापाले विश्वविद्यालयमा राजनीतिक भर्ती बन्द गर्न माग गरे।
थापापछि बोलेका सत्तारूढ नेपाल कम्युनिष्ट पार्टीका सांसद खगराज अधिकारीले विधेयक रोक्न थापाले गरेको प्रस्तावको जवाफ फर्काए।
अधिकारीले विगतमा थापाले नै मनमोहन स्वास्थ्य विज्ञान प्रतिष्ठान समितिमा गएपछि फिर्ता लिएको बताए।
‘आज मदन भण्डारीको नाम आएपछि यसलाई रोक्नुपर्छ भन्ने संजोग किन पर्यो होला,’ अधिकारीले थापाको नाम उल्लेख नगरी भने, ‘यो विषयमा म विचार गर्न चाहन्छु।’
उनले विज्ञान र प्रविधि विश्वविद्यालय आवश्यक रहेको बताए।
अधिकारीले सरकारी अनुदानमा फाउण्डेसन पूर्वएमालेका नेताहरूले नचलाएको बताए।
अधिकारीले मदन भण्डारी फाउण्डेसन श्राद्ध गर्न परिवारजन र शुभचिन्तकले चलाएको बताए।
उक्त संस्था पवित्र रहेको उल्लेख गर्दै फाउण्डेसनको प्रतिनिधित्व जरूरी नरहेको बताए।
उनले बौद्धिक क्षेत्रबाटै विश्वविद्यालय अगाडि बढ्ने बताए।
मदन भण्डारीको मर्यादा विधेयक पास गर्दा हुने उनले तर्क गरे।
