भारत प्रशासित जम्मु कस्मिरबारे पाकिस्तानका प्रधानमन्त्री मोहम्मद कुरेसीले परराष्ट्र मन्त्री प्रदीप ज्ञवालीसँग कुराकानी गरेका छन्।
बिहीबार भारतीय विदेश मन्त्री एस जयशंकर काठमाडौंबाट फर्किएको केही घन्टापछि पाकिस्तानी विदेशमन्त्री कुरेसीले ज्ञवालीलाई टेलिफोन गरेका हुन्।
पाकिस्तानी विदेश मन्त्रालयका अनुसार टेलिफोन कुराकानीका क्रममा कुरेसीले दुई साताअघि भारत सरकारले जम्मु कस्मिरबारे लिएको निर्णयको जानकारी दिएका थिए।
कुराकानीका क्रममा जम्मु कस्मिरलाई विशेष मान्यता दिने भारतीय संविधानको धारा ३७० खारेज गरी जम्मु कस्मिरको राज्यको हैसियत हटाउने भारतको निर्णय एकपक्षीय र गैरकानुनी भएको कुरेसीको बताएका थिए।
उनले भारतले चालेको कदमले क्षेत्रीय शान्ति सुरक्षामा खलल पुग्नेमा जोड दिएका थिए।
जम्मु कस्मिरमा भइरहेको मानवअधिकारको हनन् र त्यहाँका नागरिकले १७ दिनदेखि भोगिरहेको पीडाबारे पनि कुरेसीले ज्ञवालीलाई बताएका थिए।
दक्षिण एसियाली क्षेत्रीय सहयोग संगठन (सार्क)को अध्यक्षका हैसियत नेपालले क्षेत्रीय शान्ति र स्थायित्वमा भूमिका खेल्न र कस्मिरका जनतालाई पीडाबाट बाहिर ल्याउन भारतलाई मनाउन पनि कुरेसीले जोड दिएका थिए।
जवाफ परराष्ट्र मन्त्री ज्ञवालीले आफूहरूले कस्मिरको अवस्थालाई सुक्ष्म ढंगले नियालिरहेको र सबै विवादको समाधान वार्ताबाट गर्नुपर्छ भनिरहेको बताएका थिए।
दुई मन्त्रीबीच क्षेत्रीय शान्ति र स्थायित्वका लागि नियमित सम्पर्कमा रहिरहने सहमति पनि भएको पाकिस्तानी विदेश मन्त्रालयले जनाएको छ।
अगस्ट ५ मा भारतले संविधानको धारा ३७० खारेज गरेको थियो। अघिल्लो दिनदेखि नै जम्मु कस्मिरमा टेलिफोन, इन्टरनेट काटिएको थियो भने मानिसहरूलाई भेला हुन रोक लगाइएको थियो। पूर्वमुख्यमन्त्रीहरू अहिले पनि नजरबन्दमा छन्।
कुरेसीसँगको टेलिफोन कुराकानीबारे परराष्ट्र मन्त्रालय र मन्त्री ज्ञवालीको सचिवालयले कुनै सूचना सार्वजनिक गरेको छैन।