भरतपुर महानगरपालिकाले डेंगुको परीक्षणका लागि सरकारी अस्पतालमा किटको अभाव हुन नदिने बताएको छ। भरतपुर अस्पतालमा गत शुक्रबारदेखि किटको अभावमा डेंगुको परीक्षण रोकिएको छ।
महानगर प्रमुख रेनु दाहालले डेंगु परीक्षणका लागि आवश्यक पर्ने किट सरकारी अस्पतालमा उपलब्ध गराइने बताइन्।
भरतपुर अस्पतालले किटको अभाव भएको भन्दै आइतबार भरतपुर महानगरपालिकालाई पत्राचार गरेको थियो । त्यसलगत्तै महानगरले इपिडिमियोलोजी तथा रोग नियन्त्रण महाशाखा टेकुलाई पत्राचार गर्दै तत्काल एक हजार र केही दिनमा नै थप चार हजार किट उपलब्ध गराइदिन आग्रह गरेको महानगरको सामाजिक विकास महाशाखा प्रमुख प्रद्युम्न उपाध्यायले जानकारी दिए।
महानगरप्रमुख दाहालले किटको व्यवस्थापन गरिदिन उपप्रधान एवं स्वास्थ्य तथा जनसंख्या मन्त्री उपेन्द्र यादवसँग कुराकानी गरिसकेको बताइन्। महानगरप्रमुख दाहालले सम्बन्धित निकायबाट किट उपलब्ध हुन नसकेमा तत्कालका लागि प्रक्रिया पुर्याएर महानगरले व्यवस्था गर्ने बताइन्। ‘किटका कारण सरकारी अस्पतालमा डेंगु परीक्षण रोकिनु हुँदैन,’ उनले भनिन्।
भरतपुर अस्पतालका मेडिकल सुपरिटेन्डेन्ट श्रीराम तिवारीले किटको अभावमा परीक्षण रोकिएको बताए। सोमबार तीन सय वटा किट टेकुबाट आउने जानकारी दिँदै सो किटले दुई दिनभन्दा बढी नधान्ने उनले बताए। किट व्यवस्थापनका लागि महानगरप्रमुख दाहाल, प्रमुख जिल्ला अधिकारी जितेन्द्र बस्नेतलगायत सबै लागिपरेको हुँदा अबका दिनमा किटको अभाव नहुने विश्वास आफूले लिएको उनले बताए।
डेंगु परीक्षण निःशुल्क हुने गर्दछ। अस्पतालसँग किट खरीद गर्ने अधिकार र बजेट नहुने भएकाले किट नआएकै कारण सेवा रोकिएको उनको भनाइ थियो । किट भएमा जुनसुकै समयमा अस्पतालले परीक्षण गर्ने तिवारीले बताए।
अस्पतालका सूचना अधिकारी लीलाधर पौडेलले अस्पतालमा किट नहुँदा बीमाका बिरामीलाई निजी अस्पतालमा सिफारीश गर्न बाध्य भएको जानकारी दिए। निजीमा धेरै खर्च हुने भएकाले बिरामीले मार खेप्नु परेको छ। रु पाँच सय हाराहारी पर्ने सो किट निजी अस्पतालमा परीक्षण गर्दा रु दुई हजारसम्म पर्ने गर्दछ।
हालसम्म जिल्लामा ५३७ जनालाई डेंगुको सङ्क्रमण देखिएको छ। डेंगु र स्क्रबटाइफसका कारण तीन जनाको मृत्यु भइसकेको छ। जिल्लाको भरतपुर महानगरको शहरी क्षेत्रमा डेंगुको सङ्क्रमण बढिरहेको छ।
रोगले महामारीको रुप लिन सक्ने भन्दै शनिबार बिहान सचेतनामूलक र्यालीको आयोजना गरेको महानगरले रोग परीक्षण सहज बनाउन चाहेको छ। प्रमुख दाहालका अनुसार सबै वडामा सचेतनामूलक कार्यक्रम गर्न निर्देशन दिइएको छ। दैनिक माइकिङ गर्ने काम महानगरले गरिरहेको छ। अटेर गर्नेलाई कारवाही प्रक्रियासमेत अघि बढाएको जनाएको छ।
नारायणगढमा टायरमा पानी भरिँदासमेत अटेर गरेर नफालेका चार जनालाई सोमबार पक्राउ गरी प्रहरीलाई बुझाइएको महानगरले जनाएको छ।
