सिंगापुरमा उपचार गराएर शुक्रबार स्वदेश फर्किएका प्रधानमन्त्री केपी शर्मा ओलीको स्वास्थ्य सामान्य रहेको उनका निजी चिकित्सकले बताएका छन्।
प्रधानमन्त्रीका निजी चिकित्सक डाक्टर दिव्या सिंह शाहले प्रधानमन्त्री ओली स्वदेश फर्किएपछि विज्ञप्ति जारी गर्दै प्रधानमन्त्रीको स्वास्थ्य अवस्था सामान्य रहेको र नियमित काम गर्न सक्ने उल्लेख गरेकी छन्।
‘प्रधानमन्त्रीको स्वास्थ्य अवस्था सामान्य छ। उहाँले आफ्नो नियमित कामलाई निरन्तरता दिन सक्नुहुन्छ,’ उनले भनेकी छन्।
प्रधानमन्त्रीको शरीरमा बढेको एन्टीबडीलाई वैज्ञानिक प्रक्रियाबाट हटाउने प्रक्रियासमेत पूरा भएको शाहले बताएकी छन्।
प्रधानमन्त्री ओली भदौ ५ गते सिंगापुर गएका थिए। सिंगापुरस्थित नेशनल युनिभर्सिटी अस्पतालमा उपचार गरिएको थियो।
फर्किए प्रधानमन्त्री, दिएनन् प्रतिक्रिया
सिंगापुरमा उपचार गरेर प्रधानमन्त्री केपी शर्मा ओली स्वेदश फर्किएका छन्।
थाई एअरवेजको जहाजबाट शुक्रबार दिउँसो १२ बजेपछि ओली त्रिभुवन अन्तर्राष्ट्रिय विमानस्थलमा पुगेका हुन्।
विमानस्थलमा प्रतिनिधि सभाका सभामुख कृष्णबहादुर महरा, उपप्रधानमन्त्री ईश्वर पोखरेललगायतले प्रधानमन्त्री ओलीको स्वागत गरेका थिए।
१४ दिनसम्म सिंगापुरमा उपचार गराएका प्रधानमन्त्री ओलीले विमानस्थलमा समसामयिक राजनीति र आफ्नो स्वास्थ्यबारे कुनै प्रतिक्रिया दिएनन्।
नेपाल कम्युनिष्ट पार्टीको केन्द्रीय कार्यालयले प्रधानमन्त्री फर्कँदाको रिपोर्टिङ गर्न पत्रकारहरूलाई विमानस्थल बोलाएको थियो।
प्रधानमन्त्रीले सिंगापुरबाट दुई पटक भिडिओ कन्फरेन्सबाट मन्त्रीहरूसँग कुरा गरेका थिए।
पहिलो पटक भदौ १९ गते भएको भिडिओ कन्फरेन्सलाई मन्त्रिपरिषद बैठक भनिएको थियो। विदेशबाट मन्त्रिपरिषद बैठक चलाउन नमिल्ने भन्दै त्यसको विरोध भएको थियो।
त्यस्तै प्रमुख प्रतिपक्षी नेपाली कांग्रेसका सांसद गगन थापाले प्रधानमन्त्री बिरामी भएकाले उनलाई आराम दिन नेकपा नेताहरूलाई आग्रह गरेका थिए।
प्रधानमन्त्रीको स्वास्थ्यका विषयमा संसदमा सत्तापक्ष र प्रतिपक्ष सांसदको जुहारी नै चलेको थियो।
प्रधानमन्त्री ओलीले स्वदेश फर्कँदा यी कुनै पनि विषयमा प्रतिक्रिया दिएनन्।
उपचारका लागि उनी भदौ ५ गते दोस्रो पटक सिंगापुर गएका थिए।
प्लाज्मा फेरिसस प्रक्रियाबाट गरिएको उपचारले काम गरेपछि प्रधानमन्त्री पूर्ण रूपमा निको भएर आज फर्किएको उनको स्वकीय सचिवालयले जनाएको छ।
ओलीसँगै उनलाई लिन सिंगापुर पुगेका नेकपा सचिवालय सदस्य वामदेव गौतम र विष्णु पौडेल पनि स्वेदश फर्किएका छन्।
प्रधानमन्त्रीले बोलाएपछि पौडेले मंगलबार र गौतम बुधबार सिंगापुर गएका थिए।
प्रधानमन्त्रीसँगै भदौ ५ गते नै सिंगापुर गएका प्रमुख राजनीतिक सल्लाहकार विष्णु रिमाल र नीजि डाक्टरहरु दिब्या सिंह शाह र दिलिप शर्मा यसअघिनै नेपाल फर्किसकेका छन् भने सुरुदेखि नै साथमा रहेका प्रधानमन्त्री पत्नी राधिका शाक्य र स्वकीय सचिव राजेश ब्रजाचार्य आज प्रधानमन्त्रीसँगै आएका छन्।
सबै तस्बिरहरू : नारायण महर्जन/सेतोपाटी