नेपाल भ्रमणमा रहेका चिनियाँ विदेश मन्त्री वाङ यीले प्रधानमन्त्री केपी शर्मा ओलीसँग भेट गरेका छन्।
सोमबार दिउँसो परराष्ट्र मन्त्रिस्तरीय बैठक सकिएपछि विदेश मन्त्री यी प्रधानमन्त्रीलाई भेट्न बालुवाटार पुगेका हुन्।
भेटपछि प्रधानमन्त्री ओलीका परराष्ट्र सल्लाहकार राजन भट्टराईले दिएको जानकारी अनुसार नेपाल-चीन सम्बन्धलाई अझ उचाइमा पुर्याउन आफू प्रतिवद्ध रहेको प्रधानमन्त्री ओलीको भनाइ छ।
प्रधानमन्त्री ओलीले आफ्नो विगतको चीन भ्रमणको स्मरण गर्दै त्यसबेला भएका सहमति कार्यान्वयन गर्दै सम्बन्धलाई अझ उचाइमा पुर्याउने विश्वास व्यक्त गरेका छन्।
‘हामी विगतका सहमति अनुसार अघि बढेर जान चाहन्छौं र तपाईंको यो भ्रमणले पनि त्यसतर्फ अघि बढ्नलाई प्रेरित गर्नेछ भन्ने विश्वास छ’, भेटमा प्रधानमन्त्रीले भनेको कुरा उधृत गर्दै भट्टराईले भने, ‘दुई पक्षीय सम्बन्धका विभिन्न पक्षहरू छन्। शैक्षिक, सामाजिक क्षेत्र होस्,चाहे पूर्वाधार विकासको क्षेत्र होस् यी सहयोगका सबै क्षेत्रलाई विस्तार गर्ने र चीनले नेपाललाई महत्वका साथ हेरेको छ र महत्वका साथ अगाडि बढाउने कुरा जुन गरेको छ त्यसमा नेपाल खुसी व्यक्त गर्दछ।’
प्रधानमन्त्री ओलीले नेपाल एक चिनियाँ नीतिको पक्षमा रहेको स्पष्ट पारेका छन्।
‘नेपालको भूभाग हामी हाम्रा कुनै पनि छिमेकी र मित्र राष्ट्रका विरूद्धमा प्रयोग गर्न दिँदैनौं भन्नेमा हामी दृढ छौं’, उनले भने।
प्रधानमन्त्री ओलीले नेपालले चीनबाट उच्चस्तरीय भ्रमण चाँडो होस् भन्ने चाहेको बताएका छन्।
विदेशमन्त्री यीले त्यसतर्फ तयारी भइरहेकोले यो अपेक्षा चाँडै पूरा हुने बताएका छन्।
‘चीनबाट उच्च स्तरीय भ्रमणको तयारी हुँदैछ। त्यो भ्रमण उपयुक्त समयमा हुने नै छ’, विदेश मन्त्री यीको भनाइ उद्धृत गर्दै भट्टराईले भने।
प्रधानमन्त्रीसँगको शिष्टाचार भेटमा द्वीपक्षीय सम्बन्धका विषयमा कुराकानी भएको छ। यसअघि आजै नेपाल र चीनले तीन समझदारीमा हस्ताक्षर गरेका छन्।
राजधानीको होटल याक एन्ड यतिमा भएको परराष्ट्र मन्त्रिस्तरीय बैठकमा ती तीन समझदारी पत्रमा हस्ताक्षर भएको हो।
परराष्ट्र मन्त्री प्रदीप ज्ञवाली र चिनियाँ विदेश मन्त्री यीको उपस्थितिमा दुई देशका अधिकारीहरूले सम्झौता पत्र अदानप्रदान गरे।
समझदारी अनुसार चीनले हिमाल पारीको जिल्ला मनाङमा ३५ करोड ६० लाख रुपैयाँ लगानीमा अस्पताल बनाउने भएको छ।
त्यस्तै, चिनियाँ पक्षले आपतकालीन सेवाका लागि गृह मन्त्रालयलाई ५ हजार टेन्ट उपलब्ध गराउने समझदारीमा पनि हस्ताक्षर भएको छ।
चीनले बाढी प्रभावित नागरिकलाई १ करोड ६० लाख रुपैयाँ सहयोग गर्ने समझदारी पनि भएको छ।
आइतबार नेपाल आइपुगेका चिनियाँ विदेश मन्त्री यीले आजै राष्ट्रपति विद्यादेवी भण्डारीसँग पनि भेटवार्ता गर्नेछन्।
यीले मंगलबार प्रमुख प्रतिपक्षी दल नेपाली कांग्रेसका सभापति शेरबहादुर देउवा र नेपाल कम्युनिष्ट पार्टीका अध्यक्ष पुष्पकमल दाहालसँग भेटवार्ता गर्ने छन्।
उनी मंगलबार नै स्वदेश फर्कने कार्यक्रम छ।
तस्बिरहरू : कृष्ण पौड्याल