नेपाल तरूण दलका सभापति जीतजंग बस्नेत र महासचिव भूपेन्द्रजंग शाहीबीचको विवाद सतहमा आएको छ।
सभापति बस्नेतले कारबाही गरेका सिन्धुपाल्चोक उपाध्यक्षलाई महासचिव शाहीले एकलौटी ढंगले पत्र पठाएर फुकुवा गरेपछि विवाद बढेको हो।
शाहीले मंगलबार तरूण दल सिन्धुपाल्चोक उपाध्यक्ष सगुन श्रेष्ठलाई कारबाही फुकुवा गरेको पत्र पठाएका थिए। श्रेष्ठलाई संगठनको हितविपरीत काम गरेको भन्दै सभापति बस्नेतले कारबाही गरेका हुन्।
सप्तरी तरूण अध्यक्षमा सीताप्रसाद यादवलाई पनि अध्यक्ष तोकेर पत्र पठाएको भन्दै महासचिव शाहीलाई पदीय मर्यादाभित्र बस्न सभापति बस्नेतले चेतावनी दिएका छन्।
बुधबार विज्ञप्ति निकालेर सभापति बस्नेतले ‘सिन्धुपाल्चोक उपाध्यक्षलाई गरेको कारबाही यथावत रहेको र सप्तरीमा कसैलाई पनि अध्यक्ष नबनाएको’ उल्लेख गरेका हुन्।
महासचिव शाहीले आफ्नो पदीय काम, कर्तव्यविपरीत अनाधिकृत रूपमा गरेको निर्णय अस्वीकृत गरेको बस्नेतले बताएका छन्।
सभापति बस्नेतले विज्ञप्ति निकालेपछि बुधबार नै विज्ञप्ति निकालेका महामन्त्री शाहीले आफूले गरेका सबै निर्णयहरू आधिकारिक भएको उल्लेख गरेका हुन्। ‘तरूण दलको सभापतिको हवला दिएर अबदेखि कुनै पनि अवैधानिक र एकल निर्णय गर्ने अधिकार नभएकोसमेत स्पष्ट पार्न चाहन्छौं,’ शाहीले निकालेको विज्ञप्तिमा भनिएको छ।
यसअघि कांग्रेसले राष्ट्रिय जागरण अभियान सुरू गर्दा पनि सभापति र महामन्त्रीले बेग्लाबेग्लै कार्यक्रम बनाएर जिल्लामा पत्राचार गरेका थिए।