बाँके खजुरा गाउँपालिका २ सीतापुरमा बिहीबार भएको दोस्रो चरणको जागरण अभियानका क्रममा कांग्रेस जिल्ला सभापति किरण कोइरालालाई आक्रमण गरी घाइते बनाएको घटनामा प्रहरीले तीन जना नेपाल कम्युनिष्ट पार्टीका कार्यकर्तालाई पक्राउ गरेको छ।
पीडितको जाहेरी परेपछि नेकपा स्थानीय नेता लोकबहादुर शाही, निर्मल खत्री र रोशनसिंह ठकुरीले प्रहरीले बिहीबार राति पक्राउ गरेको हो।
बिहीबार दिउँसो रेडक्रसको हलमा कार्यक्रम भइराखेको बेला कार्यक्रम गर्न नदिने भन्दै नेकपा कार्यकर्ताले आक्रमण गर्दा कोइरालाको हात भाँचिएको थियो।
कोइरालाले नाम किटान गरी प्रहरीलाई बताएपछि अनुसन्धानका लागि उनीहरूलाई पक्राउ गरिएको जिल्ला प्रहरी कार्यालय बाँकेले जनाएको छ। संलग्नता पुष्टि हुने आधार देखिए कानुनअनुसार उनीहरूलाई कारबाही गरिने प्रहरीले जनाएको छ।
यसैबीच घटनाको विरोधमा नेपाली कांग्रेसले शुक्रबार बाँकेमा एक घन्टा चक्का जाम गरेको छ।
नेपालगञ्जस्थित बिपी चोकमा शुक्रबार दिउँसो साढे १२ बजेदेखि साढे १ बजेसम्म कांग्रेसले चक्का जाम र प्रर्दशन गरेको हो।
नेकपाका कार्यकर्ताले अन्धाधुन्द आक्रमण गरेको विरोधमा शान्ति सुरक्षाको माग गर्दै कांग्रेसले उक्त प्रर्दशन गरेको हो।
सभापति किरण कोइराला पनि उक्त पर्दशनमा सामेल थिइन्। शान्ति सुरक्षा प्रदान गर, अराजक गतिविधि नियन्त्रण गर भन्दै कांग्रेस कार्यकर्ताले प्रर्दशन गरेका हुन्।
