उपप्रधान तथा रक्षामन्त्री ईश्वर पोखरेलले चिनियाँ राष्ट्रपति सि चिनफिङले नेपाल भ्रमण गर्ने पक्का भएको बताएका छन्।
काठमाडौंको आफ्नो क्षेत्रमा पर्ने बूढानीलकण्ठको झोरमा आयोजित एक कार्यक्रममा बोल्दै उनले चिनियाँ राष्ट्रपति नेपाल आउने खुलासा गरेका हुन्।
चिनियाँ राष्ट्रपति सिको नेपाल भ्रमणका बेला केरूङ्ग काठमाडौं जोड्न झोरदेखि जोरभन्ज्याङ हुँदै नुवाकोट निस्किने सुरूङ्गमार्ग सहितको सडक बनाउन औपचारिक सम्झौता हुने पोखरेलले बताए।
‘म यहाँ एउटा सुखद खबर भन्न चाहन्छु। अब काठमाडौंबाट केरूङ जाने बाटो यही ठाउँबाट बन्छ। झोरबाट सुरूङ बनेर गोर्जेभञ्ज्याङ् हुँदै नुवाकोट निस्किने बाटो बनाउन चीन सरकारसँग सम्झौता गर्दैछौं। अब चीन सरकारका राष्ट्रपति सि चिनफिङको आगमन हुँदैछ। त्यही बेला औपचारिक सम्झौता हुन्छ,’ उनले भने।
चीनका राष्ट्रपति सि अक्टोबर ११ मा भारत भ्रमण गर्दैछन्। भारत भ्रमणबाट फर्किँदा नेपालमा आउने चर्चा छ। यसअघि सन् १९९६ मा चीनका तत्कालीन राष्ट्रपति जियाङ्ग जेमिन नेपाल भ्रमणमा आएका थिए।
त्यसपछि चीनबाट यति उच्च तहको भ्रमण नेपालमा भएको छैन। सन् २०१२ मा चिनियाँ प्रधानमन्त्री वेन जिया बाओ चार घण्टाका लागि मात्र नेपालमा उत्रिएका थिए।
