नेपाल कम्युनिष्ट पार्टी (नेकपा) का स्थायी समिति सदस्य जनार्दन शर्माले चिनियाँ राष्ट्रपति सी जिनपिङले ल्याएको ‘बेल्ट एण्ड रोड इनिशिएटिभ’ (बिआरआई) बारे धारणा राख्दै नेपालीहरूमा स्वतन्त्र निर्णय गर्न सक्ने क्षमता छ कि छैन भनेर प्रश्न गरेका छन्।
नेकपाले शनिबार काठमाडौंमा गरेको अन्तर्क्रियामा सांसद घनश्याम भुसालले राखेको प्रस्तुतीकरणपछि बिआरआईबारे आफ्ना बुझाइ राखेका शर्माले भने, ‘हामी नेपालीहरूले बुझ्नुपर्ने र जान्नुपर्ने कुरा हामी हाम्रो निर्णय गर्ने क्षमता राख्न सक्छौं कि सक्दैनौं? स्वतन्त्र निर्णय राख्न सक्ने क्षमता। हाम्रो आत्मविश्वास कति छ भन्नेमा पनि यो निर्भर रहन्छ।’
उनले आफ्नै स्वतन्त्र निर्णय गर्ने क्षमता राख्न सक्ने हो भने हाम्रा हितमा हुने कुरालाई आत्मसाथ गरेर अघि बढ्ने हिम्मत हुनुपर्ने बताए। ‘नेपाल र नेपाली जनताको हितमा हामी अहिले बेल्ट एण्ड रोडको एउटा महत्व र सही प्रयोग गरेर नेपालको समृद्धि र विकासमा अघि बढ्न सक्छौं,’ उनले भने।
बिआरआईलाई एक असल छिमेकीले देखाएको पारस्परिक लाभको रूपमा स्वीकार्य गर्नुपर्ने पनि शर्माले बताए। समाजवादी विचार अभियानको रूपमा बिआरआईको चर्चा गर्दै शर्माले थपे, ‘भौतिक संमृद्धिको अभियान मात्र भन्ने मैले देख्दिनँ। यो समाजवादी विचार अभियानको रूपमा भन्ने बुझेँ।’