प्रमुख प्रतिपक्ष दल नेपाली कांग्रेसका सभापति शेरबहादुर देउवाले ‘महराकाण्ड’ का दोषीमाथि कारबाही नगरेकोमा सरकारप्रति रोष प्रकट गरेका छन्।
पूर्वप्रधानमन्त्री समेत रहेका सभापति देउवाले यौन दुर्व्यवहारको आरोप लागेपछि सभामुख पदबाट राजीनामा दिएका कृष्णबहादुर महरामाथि कारबाही गर्नुको साटो सरकार आफैंले संरक्षण गर्ने काम गरिरहेको दाबी गर्दै आक्रोश व्यक्त गरे।
दसैंको अवसर पारेर शनिबार काठमाडौंमा आयोजित शुभकामना अदानप्रदान कार्यक्रममा बोल्दै उनले पीडित महिलालाई धम्क्याएर, तर्साएर मुद्दा हाल्न नदिएको सबै कुरा बाहिर आउँदा पनि त्यस्ता बदमासी गर्ने महरामाथि किन कारबाही नगरिएको? भनि सरकारलाई प्रश्न गरे।
‘त्यस्तो बदमासी गर्ने अनि उल्टै सो घटनाको तथ्य लेख्नेमाथि ज्यान मार्ने धम्की दिने काम भइरहेको छ,’ सभापति देउवाको भनाइ थियो, ‘त्यस्ता मान्छेलाई बचाउन जे पनि गरिरहेका छन्।’
सभापति देउवाले सर्वसाधारणले दसैं समेत मनाउन नसक्ने गरी महँगी बढ्दा पनि सरकारले नियन्त्रण गर्न नसकेको दाबी गरे।
